Монсудар: Сурах бичгийн тендерт мэргэжлийн бус үнэлгээ давамгайлж байна

Нэгдүгээр ангийн сурах бичиг хэвлэх, зохиох тендерт сайд, дарга нартай холбоотой компаниуд шалгарсан асуудлыг Монсудар хэвлэлийн газрын төлөөллүүд мэдээлэл хийлээ.

Сурах бичиг гэдэг үгийг сонсонгуутаа их хэмжээний бэлэн мөнгөний бизнес гэж ойлгодог нь туйлын харамсалтай

гэж тус хэвлэлийн газрын захирал Р.Энхбат хэлсэн.

Тэрбээр тендерийн шалгаруулалтын журмын талаар ярихдаа:

Бид хайрцаглах гэж үгийг мэднэ. Мөн тавилттай тендер гэж мэднэ. Эхнээсээ хэнийг хэрхэн яаж шалгаруулж, хэдэн төгрөг өгөх вэ гэдэг бүх ажлаа төлөвлөөд тендер зарладаг. Яг ийм хайрцагт бид ороод гарлаа

гэж мэдэгдсэн.

Түүний хэлснээр, төрийн гүйцэтгэх ёстой ажил нэмэгдэх тусам мөнгө, эрх мэдэл дагалдаж, мэргэжлийн хүмүүсийн хэрэгцээ буурч байна.

Монголд хэвлэлийн газар гэдэг 120 гаруй бүртгэлтэй байгууллага байдаг бөгөөд нэгдүгээр ангийн сурах бичгийн тендерт Монсудар оролцсон. Харин уг тендерт

УИХ-ын хоёр гишүүн, тэдний нэг нь сайдаар ажилладаг ийм хүмүүсийн компаниудыг тендерт шалгарууллаа

гэж Р.Энхбат шүүмжилсэн.

Боловсролын Яам болон Боловсролын Ерөнхий Газрын дарга Х.Тамирын удирдсан энэ шалгаруулалт мэргэжлийн түвшинд явагдаагүй гэж тэрбээр үзэж байна. Түүнчлэн мэргэжлийн байгууллага, мэргэжилтнүүд боловсролыг хөгжүүлэх ёстой байтал тэдний хэрэгцээ буурч, хэвлэлийн хоёр үйлдвэр бүх захиалгыг өөрсдийн болгож авсан гэж хэллээ.

Төсөв нэмэгдэх тусам ажлын үр дүнг тооцдоггүй тогтолцооноос гарах шаардлагатайг тэрбээр дурдаж, энэ хэвлэлийн бага хурлын дараа УИХ-д бичиг явуулахаар төлөвлөсөн гэж мэдэгдэв.

Хиймэл оюун ба тендерийн ялагчид

Р.Энхбат цааш нь:

Хиймэл оюунд даалгавар өгөөд сарын дотор зарлагдсан тендерт ялагч болж ирж байгаа хүмүүсийг нийгэмд хэлэх ёстой гэж бодож байна

гэж хэлсэн.

Монголын хэвлэлийн салбарт хүүхдийн контентыг манайх олон жил хийсээр ирсэн боловч чадвартай хүмүүс цөөн, үнэлэмж өндөр учраас нийт ард түмний хэрэглээ болж чаддаггүй гэж тэрбээр тайлбарлав. Тэд сурах бичгээр дамжуулан контентоо хүүхдүүдэд хүргэх зорилгоор энэ ажилд орсон ч сурах бичгийг зөвхөн мөнгөний бизнес гэж ойлгодог нь харамсалтай гэлээ.

Хэвлэлийн газруудын дунд зарласан уралдаанд хоёр үйлдвэр орж ирээд бүх юмыг хамаад явчихна гэхээр үнэхээр өрөвдөлтэй

гэж тэрбээр нэмж хэлсэн.

Үнэлгээний хорооны мэргэшлийн асуудал

Монсудар хэвлэлийн газрын хуульч тендерийн захиалагч нь Боловсролын Ерөнхий Газар бөгөөд тендер удаан үргэлжилж байгаа гол шалтгаан нь захиалагч байгууллагын үнэлгээний хорооны мэдлэг, ур чадвар, мэргэшсэн байдалтай холбоотой гэж үзэж байна.

Төрийн өмчийн хөрөнгөөр бараа, ажил, үйлчилгээ худалдаж авах тухай хуулийн 11.1-д тендерийн баримт бичгийг захиалагч батална гэж заасан ч анх боловсруулсан баримт бичгийн 80 гаруй хувь нь сүүлд өөрчлөгдсөн гэж тэрбээр онцлов. Анхнаасаа тооцоо судалгаанд үндэслээгүй, мэргэшсэн хүмүүсээр удирдуулаагүйн улмаас өнөөдөр сурагчид сурах бичиггүй, нэг удаагийн дасан зохицуулах хөтөлбөр нэртэй гарын авлагыг хэрэглэж байна гэж тэрбээр мэдэгдэв.

Түүнчлэн БЕГ-ын дарга Х.Тамирын томилгоо хууль ёсных эсэхэд эргэлзээтэй байгааг дурдав. Төрийн албаны тухай хуулийн 18.2, 23.2.1-д тэргүүн түшмэлийн албан тушаалд томилогдохын тулд эрхэлсэн түшмэлийн албан тушаалд зургаагаас доошгүй жил ажилласан байхыг шаарддаг ч түүний ажлын түүхээс харахад дөрвөн жилийн хугацаанд эрхэлсэн түшмэлийн ажлыг гүйцэтгэжээ. Хэрхэн дүйцүүлж томилогдсон нь тодорхойгүй гэж тэрбээр хэллээ.

Мөн төрийн өмчийн хөрөнгөөр бараа, ажил, үйлчилгээ худалдан авах тухай хуулийн 50.6-д заасны дагуу үнэлгээний хороонд сурах бичигтэй холбоотой асуудлаар мэргэшсэн хүнийг томилж ажиллуулсан эсэх, хороонд ямар хүмүүс байгаа нь асуудалтай байгааг онцлов. Сурах бичгийн мэргэшсэн ахлах мэргэжилтнүүд байгаа эсэх нь хамгийн том асуудал болж байна гэв.

Бидний сонсож ойлгосноор барилгын асуудал хариуцсан мэргэжилтэн нь хүүхдүүдийн сурах бичиг хийх, зохиох энэ үнэлгээний хороонд гишүүнээр ажиллаж байна. Юу хийж явааг нь бид ойлгохгүй байна

гэж тэрбээр хэлсэн.

Оюуны өмчийн зөрчил

Сургуулийн өмнөх болон Ерөнхий боловсролын тухай хуулийн 11.4-т Ерөнхий боловсролын сурах бичгийг ашиглах онцгой эрх Боловсролын Яаманд байхаар заасан. Гэтэл 2024-2025 онд татвар төлөгчдийн 6.7 тэрбум төгрөгөөр боловсруулсан туршилтын сурах бичгийг оролцогч компаниудаас өөрсдийнхөө зохиосон мэтээр оруулж ирж байгаа нь эргэлзээтэй гэж хуульч мэдэгдэв.

Тэр хүмүүсийн гарт эдгээр сурах бичгийн агуулга хэрхэн очсон бэ гэдэг нь тодорхойгүй бөгөөд оюуны өмчийн зөрчилтэй байж болзошгүй асуудал гарч байгааг тэрбээр нэмж тайлбарлалаа.