Монложистикс Групп хүнд даацын цахилгаан тээврийн дэд бүтэц байгуулах санамж бичигт гарын үсэг зурлаа

Монгол Улсад сэргээгдэх эрчим хүчид түшиглэсэн хүнд даацын цахилгаан тээврийн цэнэглэх дэд бүтцийг хөгжүүлэх зорилгоор Монложистикс Групп болон “Эм Эм Эс Инженеринг” ХХК хамтарсан компани байгуулах тухай санамж бичигт гарын үсэг зурсан байна.

Энэхүү хамтын ажиллагаа нь Засгийн газрын 2026 оны 4 дүгээр сарын 29-ний өдрийн 160 дугаар “Түлш, эрчим хүчний хараат байдлыг бууруулах тухай” тогтоолын зорилттой уялдаж буйг эх сурвалж онцолсон. Уг тогтоолд хувийн хэвшлийн хөрөнгө оруулалтад тулгуурлан сэргээгдэх эрчим хүчний эх үүсвэр бүхий цахилгаан тээврийн цэнэглэх дэд бүтцийг хөгжүүлэх чиглэлийг тусгасан аж.

Монложистикс Группийн тээвэр, ложистикийн салбарын туршлага, ачаа тээврийн бодит хэрэгцээг “Эм Эм Эс Инженеринг” ХХК-ийн эрчим хүч, инженерингийн чадавх болон “NEXUS NET ZERO” төслийн шийдэлтэй уялдуулан, Монголын анхны өндөр хүчин чадлын цэнэглэх станц, сэргээгдэх эрчим хүч, батарей хуримтлуурын систем бүхий дэд бүтцийг цогцоор нь хөгжүүлэхээр төлөвлөж байна.

Хамтын ажиллагааны эхний төслийг импортын ачаа тээврийн гол коридор болох Замын-Үүд–Улаанбаатар чиглэлийн нийт 670 км замд хэрэгжүүлж, хүнд даацын цахилгаан автомашины тасралтгүй, найдвартай ажиллагааг хангах ногоон өртөөнүүдийг үе шаттайгаар байгуулах юм.

Төслийн бүрэн хэрэгжилтийн дүнд импортын авто тээврийн өртгийг 40 хүртэл хувиар бууруулах нөхцөл бүрдэж, импортын шатахууны хэрэглээг 3.4 орчим хувиар, нүүрсхүчлийн хийн ялгарлыг жилд 198 мянган тонн хүртэл бууруулах тооцоололтой байна. Мөн ногоон санхүүжилт татах боломж нэмэгдэж, цахилгаан тээвэр, сэргээгдэх эрчим хүч, инженер техникийн салбарт шинэ ажлын байр бий болох, мэргэжлийн ур чадвар хөгжих ач холбогдолтойг эх сурвалж дурдсан.

Талууд хамтын ажиллагаагаар хувийн хэвшлийн хөрөнгө оруулалт, технологи, инженерийн шийдэлд тулгуурлан ногоон тээврийн шилжилтийг дэмжиж, түлшний импортын хараат байдлыг бууруулах, тогтвортой тээврийн дэд бүтцийг хөгжүүлэхэд бодит хувь нэмэр оруулахыг зорьж байна.