Монголын Хүүхдийн ордон хичээлийн шинэ жилийн нээлтээ хийлээ

Монголын Хүүхдийн ордны 2026-2027 оны хичээлийн шинэ жилийн нээлт болж, Монгол Улсын Ерөнхийлөгч У.Хүрэлсүх, Нийслэлийн иргэдийн Төлөөлөгчдийн Хурлын дарга Д.Ихбаяр оролцлоо.

Хүүхдийн ордны захирал Б.Цэнгэлмаа байгуулагдсанаас хойш 68 жилийн хугацаанд 160 мянга гаруй хүүхэд дугуйлан, секцэд хамрагдан төгссөнийг онцлов. Мөн Ерөнхийлөгчийн санаачилгаар "Мазаалай" хүүхдийн спорт цогцолборын бүтээн байгуулалт 2026 онд эхэлсэн бөгөөд ирэх оны Хүүхдийн баяраар ашиглалтад оруулахаар ажиллаж байгааг танилцуулав.

Ерөнхийлөгч У.Хүрэлсүх хүүхэд багачууд, багш нарт хичээлийн шинэ жилийн мэндчилгээ дэвшүүлж, спорт цогцолборын нэршил нь хүүхдүүдийн тэмүүлэл, тэсвэр тэвчээрийг бэлгэддэг тухай ярилаа. Тэрбээр цогцолбороос спорт, урлаг, соёлын шилдэг төлөөлөл төрөн гарна гэдэгт итгэлтэй байгаагаа илэрхийлэв.

Нээлтийн үеэр амжилттай ажилласан Хүүхдийн ордны багш, алба хаагчдад төрийн дээд одон, медаль гардуулж, Их эзэн Чингис хааны эш хөргийг хүндэтгэлтэйгээр залсан байна. Эш хөргийг залах нь түүх, өв соёлоо эрхэмлэх, эх оронч үзлийг төлөвшүүлэхэд ач холбогдолтой гэж үзжээ.

Дараа нь Ерөнхийлөгч, НИТХ-ын дарга нар "Мазаалай" цогцолборын барилгын ажлын явцтай танилцлаа. Тус цогцолбор ашиглалтад орсноор спортын 14 төрлийн дугуйлан хичээллэх боломж бүрдэж, жил бүр 7,000 гаруй хүүхэд сургалтад хамрагдах ажээ.