Монголын хөрөнгийн бирж Лондон дахь хөрөнгө оруулалтын форумд оролцлоо

Capital Markets Mongolia (CMM)-с ИБУИНВУ-ын Лондон хотод 2026 оны 9 дүгээр сарын 15-нд зохион байгуулсан "Монголын хөрөнгө оруулалтын форум: Лондон 2026" арга хэмжээ болж өндөрлөлөө.

Форумд олон улсын 80 гаруй байгууллагын 150 гаруй хөрөнгө оруулагч, хөрөнгийн зах зээлийн мэргэжлийн байгууллагуудын зочид төлөөлөгчид, Монголын банк, санхүү, технологийн салбарын тэргүүлэгч байгууллагуудын төлөөлөл оролцжээ. Тэд Монголын санхүү, хөрөнгийн зах зээлийн хөгжил, мэдээллийн технологи, хиймэл оюун ухааны салбарын боломжуудын талаар хэлэлцсэн байна.

"Монголын хувьцааны зах зээлийн шинэ үе" сэдэвт хэсэгт "Монголын хөрөнгийн бирж" ХК-ийн Гүйцэтгэх захирлын үүргийг түр орлон гүйцэтгэгч Д.Мөнхбат оролцож, Монголын хөрөнгийн зах зээлийн өнөөгийн байдал, сүүлийн жилүүдийн өсөлт, хөрөнгө оруулалтын боломж, цаашдын хөгжлийн бодлого, зорилтын талаар танилцуулсан байна.

Мөн Монгол Улсын Засгийн газраас төрийн өмчит компаниудын засаглал, үр ашгийг сайжруулах, олон нийтийн хяналтыг нэмэгдүүлэх чиглэлээр хэрэгжүүлж буй реформын хүрээнд төрийн өмчит компаниудыг хөрөнгийн зах зээлээр дамжуулан олон нийтэд нээлттэй болгох арга хэмжээний талаар мэдээлэл өгчээ.

Форумын үеэр олон улсын хөрөнгө оруулалтын менежментийн компани болох Franklin Templeton-ийн Төв Азийн бүс хариуцсан Гүйцэтгэх захирал Мариус Дан Румын болон Узбекистан улс дахь ижил төстэй сангуудыг удирдсан туршлагад тулгуурлан төрийн өмчит компаниудыг хөрөнгө оруулагчдад нээлттэй компани болгох, төрийн өмчит хөрөнгийг мэргэжлийн удирдлагаар хангах, дотоодын болон олон улсын хөрөнгийн зах зээлээр дамжуулан хөрөнгө татах нь Монгол Улсад урт хугацааны институционал хөрөнгө оруулалтыг нэмэгдүүлэх, төрийн өмчит компаниудын үнэ цэнийг өсгөх, хөрөнгийн зах зээлийн хөгжлийг эрчимжүүлэх ач холбогдолтойг тэмдэглэсэн гэж Монголын хөрөнгийн биржээс мэдээлэв.