Монголын эмэгтэй шатарчид олимпиадад VII байр эзэллээ

Шатрын 46 дугаар олимпиад есдүгээр сарын 15-наас 27-ныг дуустал Узбекистаны Самарканд хотноо зохион байгуулагдав.

Ц.Батсайхан ахлагчтай Монголын эмэгтэй баг I ширээнд эмэгтэй олон улсын мастер Б.Мөнгөнзул, II ширээнд эмэгтэй их мастер Т.Мөнхзул, III ширээнд эмэгтэй спортын мастер Б.Хишигбаатар, IV ширээнд олон улсын мастер Б.Мөнгөнтуул, V ширээнд эмэгтэй олон улсын мастер Б.Баярмаа нарын бүрэлдэхүүнтэй оролцов.

Эхний есөн өргийн дараа дөрөвдүгээрт жагсаж байсан баг 10 дахь өрөгт Польшид 1:3-аар ялагдаж, сүүлийн өрөгт Грекийг 2:1-ээр буулган авснаар багаараа VII байр эзэллээ.

Эмэгтэйчүүдийн ангилалд БНХАУ 20 оноогоор алтан медаль, Казахстан 18 оноогоор мөнгө, Энэтхэг 17 оноогоор хүрэл медаль хүртэв. АНУ, Польш, Армени, Монгол ижил 17 оноотой ч нэмэлт үзүүлэлтээр IV-VII байранд жагссан бол эхний 10 байранд Гүрж, Вьетнам, Словени баг бичигдлээ.

Эрэгтэйчүүдийн ангилалд Узбекистан 20 оноогоор манлайлж, Энэтхэг, Герман 18 оноогоор медальт байранд шалгарсан бол АНУ, Азербайжан, Армен, Унгар ижил 17 оноо, БНХАУ, Франц, Испани 16 оноогоор эхний 10-т орлоо.

Их мастер С.Билгүүн, олон улсын мастер М.Амилал, Г.Амартүвшин, Х.Итгэлт, Ү.Агьбилэг нарын бүрэлдэхүүнтэй Монголын эрэгтэй баг 15 оноогоор 26 дугаарт бичигдлээ.

Нээлттэй ангилалд 204 орны 206 баг, эмэгтэйчүүдийн ангилалд 187 орны 189 баг ур чадвараа сорьсон бөгөөд дараагийн олимпиад Арабын Нэгдсэн Эмират Улсын Абу Даби хотноо болох юм.