Монголбанк бодлогын хүүг 12.5 хувьд хэвээр үлдээлээ

Монголбанкны Мөнгөний бодлогын хороо 2026 оны 9 дүгээр сарын 16, 17-ны өдрүүдэд ээлжит хурлаа хийж, бодлогын хүүг 12.5 хувьд хэвээр хадгалах шийдвэр гаргасан байна.

Хорооны шийдвэрт инфляц, эдийн засаг, банк, санхүүгийн зах зээлийн өнөөгийн байдал, дотоод, гадаад орчны төлөв, эрсдэлийг харгалзсан гэж Монголбанк мэдээлэв.

Жилийн инфляц 8 дугаар сард улсын хэмжээнд 0.5 нэгж хувиар буурч 12.5 хувь болсон бол Улаанбаатар хотод 1.4 нэгж хувиар буурч 11.6 хувьд хүрчээ. Мах, хүнсний ногооны нийлүүлэлт нэмэгдэж, дотоодын хүнсний үнийн өсөлт саарсан нь инфляц буурахад голлон нөлөөлсөн байна. Суурь инфляц мөн 8 дугаар сард 6.8 хувь болж, өмнөх сараас бага зэрэг буурчээ.

Гэхдээ шатахууны үнийн өсөлт, түүний дам нөлөө, дэлхийн хүнсний үнийн өсөлт, төсвийн зардал, цалингийн өсөлтөөс шалтгаалан инфляц нэмэгдэх эрсдэлтэй гэж үзжээ.

Эдийн засаг энэ оны эхний хагаст 7.7 хувиар өсөхөд уул уурхай, тээврийн салбар голлон нөлөөлж, бусад салбарын идэвхжил сул хадгалагдсан байна. Энэ онд хөдөө аж ахуй, аж үйлдвэрийн өсөлт саарах бол уул уурхай, тээврийн салбар өнгөрсөн оноос эрчимжиж, худалдааны салбарын өсөлт эерэг болох төлөвтэй гэж тооцоолжээ.

Гадаад орчинд тодорхой бус байдал өндөр хэвээр байна. Ойрх Дорнодын зөрчилдөөнөөс газрын тос, эрчим хүчний үнэ өсөж, дэлхий даяар инфляцын дарамт нэмэгдэх хандлагатай байгаа ч алт, зэсийн үнэ хүлээлтээс өндөр түвшинд хадгалагдаж, манай улсын худалдааны нөхцөлд эерэгээр нөлөөлж, гадаад валютын нөөцийн хүрэлцээ сайжирч, төгрөгийн ханш харьцангуй тогтвортой байна.

Инфляц ирэх оны хоёрдугаар улирлаас алгуур саарч, оны эцэст зорилтын дээд интервалын орчимд хүрэх төлөвтэй байгаа ч энэ оны төсвийн тодотгол, ирэх оны төсвийн төсөл хэрхэн батлагдах нь инфляцын цаашдын төлөвт томоохон өөрчлөлт оруулах эрсдэлтэй гэж Монголбанк анхааруулжээ.

Цаашид инфляцын өрнөл, нийлүүлэлтийн хүчин зүйлс, гадаад, дотоод эдийн засгийн нөхцөл байдлын өөрчлөлтөөс хамаарч бодлогын дараагийн алхмыг тухай бүр авч хэрэгжүүлнэ гэж мэдэгдсэн байна.

Хуралдааны хураангуй тэмдэглэлийг хоёр долоо хоногийн дараа Монголбанкны цахим хуудаст байршуулна.