Монгол, Японы ГХ-ын сайд нар хэлэлцээ хийж, давхар татварын хэлэлцээрийн ач холбогдлыг онцлов

Монгол Улсын Гадаад харилцааны сайд Батмөнхийн Батцэцэг, Япон Улсын Гадаад хэргийн сайд Мотэги Тошимицү нар энэ сарын 3-ны өдөр албан ёсны хэлэлцээ хийж, хоёр улсын харилцаа, хамтын ажиллагааны өнөөгийн байдал, цаашдын зорилтын талаар санал солилцов.

Сайд Б.Батцэцэг өнгөрсөн зургаадугаар сард Токиод уулзсан тариа дурдаж, энэ удаагийн айлчлалаар хэлэлцээгээ үргэлжлүүлж буйд талархал илэрхийлэв. Тэрбээр Японыг Монголын чухал “гуравдагч хөрш” гэдгийг онцолж, хоёр улсын найрсаг харилцааг гүнзгийрүүлэх нь гадаад бодлогын тэргүүлэх чиглэлүүдийн нэг хэмээн тэмдэглэв.

Талууд “Энх тайван, хөгжил цэцэглэлтийн төлөөх Тусгай стратегийн түншлэл”-ийн хүрээнд хамтын ажиллагааг өргөжүүлэхээр тохиролцож, хоёр талын эдийн засгийн хамтын ажиллагааны үр өгөөжийг нэмэгдүүлэхэд давхар татварын хэлэлцээр байгуулахын ач холбогдлыг харилцан нотлов.

Мөн “Чингис хаан” олон улсын нисэх буудлын өргөтгөлийн төслийг Японы Засгийн газрын хөнгөлөлттэй зээлээр хэрэгжүүлэхэд зарчмын тохиролцоонд хүрсэнд баяртай байгаагаа илэрхийлэв. Талууд боловсрол, соёл, орон нутаг хоорондын харилцааг өргөжүүлэх, хүүхэд залуучуудын солилцоог гүнзгийрүүлэхээр ярилцав.

2027 онд хоёр улсын дипломат харилцаа тогтоосны 55 жилийн ой тохиох бөгөөд энэ үеэр хамтын ажиллагааны арга хэмжээ зохион байгуулах саналыг тавьж, талууд ач холбогдол өгч ажиллахаар боллоо. Түүнчлэн бүс нутаг, олон улсын харилцааны асуудлаар санал солилцож, НҮБ зэрэг олон талт хамтын ажиллагаагаа үргэлжлүүлэхийн төлөө байгаагаа илэрхийлэв.

Японы тал Монгол Улс НҮБ-ын Цөлжилттэй тэмцэх конвенцын Талуудын 17 дугаар бага хурлыг Улаанбаатарт амжилттай зохион байгуулсанд баяр хүргэж, Монголын тал “Зүүн хойд Азийн аюулгүй байдлын асуудлаарх Улаанбаатарын яриа хэлэлцээ” олон улсын бага хуралд Япон Улс оролцсонд талархав. Хэлэлцээ найрсаг дотно уур амьсгалд болж өндөрлөсөн гэж Гадаад харилцааны яамнаас мэдээлэв.