Монгол Улсын 3.6 сая хүнээс 140 мянга нь архинаас хамааралтай

Хууль зүй, дотоод хэргийн сайд С.Амарсайхан Төв аймгийн Баян суманд байрлах Согтуурах, мансуурах донтой өвчтөнийг албадан эмчлэх, хөдөлмөр хийлгэх газарт өчигдөр /2026.09.02/ ажиллаж, нөхцөл байдалтай танилцсан. Тэрбээр эмчилгээний тариф, стандартыг шинэчлэх, хар тамхи болон архины донтолтыг ялгаж эмчлэх шаардлагатайг хэлж, 140 мянган архинаас хамааралтай хүний 10 хувь нь л эмчилгээ үйлчилгээ авч байгааг онцолсон.

Энэхүү байгууллага анх 1961 онд Хөдөлмөр хүмүүжлийн бригад нэртэйгээр байгуулагдаж, 2003 оноос одоогийн байршилд үйл ажиллагаагаа явуулж байна. 2020-2026 онд архины шалтгаант сэтгэц зан үйлийн эмгэг оноштой 3,216 хүн шүүхийн шийдвэрээр эмчлүүлсэн бол жилд дунджаар 400-500 хүн хүлээн авдаг аж.

С.Амарсайхан “Хэвтэн эмчлүүлж буй хүмүүсийн эмчилгээ оношилгооны тарифыг шинэчилнэ. Сарын 70 мянган төгрөгөөр хордлого тайлах шингэн хийгээд болчихлоо гэж үзэх боломжгүй. Эмчилгээний төлбөрийг 2019 оноос хойш өөрчлөөгүй” гэж хэлсэн.

Мөн тэрбээр “Архидан согтуурахтай тэмцэх сангийн мөнгөнөөс эмчилгээний зардлын санхүүжилтийг шийднэ. Тус санд байгуулагдсан цагаас хойш 18 тэрбум төгрөгийн санхүүжилт төвлөрсөн хэдий ч зөв зарцуулж чадаагүй. Архи үйлдвэрлэж, импортолж буй аж ахуйн нэгжүүдтэй уулзаж, хамтран ажиллана. Нэг литр архинаас 300 төгрөг төвлөрүүлдэг ч зарцуулалт нь тодорхой бус байна” гэв.

ХЗД-ийн сайд шинэ төв байгуулах зураг төсөл бэлэн болсныг дурдаж, хөрөнгө мөнгийг шийдвэрлэх шаардлагатайг хэлсэн. Түүнчлэн “Хар тамхийг нийлүүлж буй гадаадын сүлжээ, нийлүүлэгчид дээр онцгой анхаарал хандуулах ёстой. Энэ хичээлийн шинэ жилээс хүүхэд залуучуудад хор уршгийг таниулах ажлыг боловсролын байгууллагаар дамжуулж эхэлнэ” гэж тодруулсан. Хөдөлмөр, нийгмийн хамгааллын яам нийгэмшүүлэх, Эрүүл мэндийн яам эмчилгээ оношилгооны чиглэлийг хариуцна гэдгийг ч сайд онцолсон.

“3.6 сая хүн амтай Монгол Улсын 140 мянга нь архинаас хамааралтай байна гэдэг асар том тоо. Хэрэглээ, донтолттой холбоотой асуудлыг мэргэжлийн түвшинд авч үзэхгүй бол энд байгаа хэдхэн хүнээр хязгаарлагдана” гэж С.Амарсайхан ярилаа.