Монгол, ОХУ түлш, эрчим хүчний хамтын ажиллагааг эрчимжүүлэхээр тохирлоо

Монгол Улсын Ерөнхий сайд Н.Учрал ОХУ-ын Владивосток хотноо болж буй Дорнын эдийн засгийн XI чуулга уулзалтын хүрээнд 9 дүгээр сарын 02-ны өдөр ОХУ-ын Ерөнхийлөгч В.В.Путинд бараалхав.

Ерөнхийлөгч В.В.Путин Монгол Улсыг ОХУ-ын Ази, Номхон далайн бүс нутаг дахь стратегийн чухал түнш гэдгийг тэмдэглэсэн бол Ерөнхий сайд Н.Учрал ОХУ-тай сайн хөршийн найрсаг харилцаа, харилцан ашигтай хамтын ажиллагааг хөгжүүлэх нь гадаад бодлогын тэргүүлэх чиглэлийн нэг гэдгийг онцлов.

Уулзалтын үеэр талууд эрчим хүч, тээвэр, дэд бүтэц, уул уурхай, хөдөө аж ахуйн салбарт хамтын ажиллагааг өргөжүүлэх, Монгол Улсын түлш, эрчим хүчний аюулгүй байдлыг хангах, бензин, түлш, газрын тосны бүтээгдэхүүний тогтвортой нийлүүлэлт, Монгол, Орос, Хятадыг холбосон төмөр замын коридор хөгжүүлэх асуудлаар тодорхой шийдлүүд гаргав.

Мөн Дулааны цахилгаан станц-3, Асгатын уурхайн хамтарсан судалгаа, Монгол Улсын нутаг дэвсгэрээр дамжуулан БНХАУ-д байгалийн хий нийлүүлэх төсөл, шатахууны хангамж зэрэг хоёр талын эдийн засгийн хамтын ажиллагааны төсөл, хөтөлбөрүүдийн хэрэгжилтийг эрчимжүүлэхээр тохиров.

Ерөнхий сайд Н.Учрал БНКУ-ын Бишкек хотноо болсон Шанхайн хамтын ажиллагааны байгууллагын дээд түвшний уулзалтын үеэр Монгол Улсын Ерөнхийлөгч У.Хүрэлсүхтэй уулзаж, хоёр улсын Иж бүрэн стратегийн түншлэлийн харилцааг гүнзгийрүүлэх асуудлаар санал солилцсоныг дурдав. Тэрбээр хоёр улсын худалдааны эргэлт өнгөрсөн онд дөрөв гаруй хувиар өссөн, Монгол Улс, Евразийн эдийн засгийн холбооны хооронд байгуулсан худалдааны Түр хэлэлцээр өнгөрсөн долоодугаар сараас хүчин төгөлдөр мөрдөгдөж эхэлснийг онцолсон юм.

Түүнчлэн талууд Евразийн эдийн засгийн холбоотой байгуулсан чөлөөт худалдааны Түр хэлэлцээрийг амжилттай хэрэгжүүлэх, малын гаралтай экспортыг нэмэгдүүлэхэд саад болж буй малын гоц халдварт өвчинтэй тэмцэх, вакцинжуулалтын асуудлаар хамтран ажиллахаар болов.

Уулзалтад Монголын талаас Монгол Улсаас ОХУ-д суугаа Элчин сайд Д.Даваа, Улсын Их Хурлын Дэд дарга Б.Пүрэвдорж тэргүүтэй төлөөлөгчид, ОХУ-ын талаас Гадаад хэргийн сайд С.В.Лавров, Шадар сайд А.Л.Оверчук зэрэг албаныхан оролцлоо.