МХБ-ийн ногоон болон тогтвортой бондууд Люксембургийн DataHub-д нийтлэгдэж эхэллээ

Санхүүгийн зохицуулах хороо, Сангийн яам, Монголын Хөрөнгийн Бирж (МХБ) болон Люксембургийн хөрөнгийн бирж (LuxSE)-ийн төлөөллүүд 2026 оны 6 дугаар сард албан уулзалт хийжээ. Уулзалтын үр дүнд МХБ-д бүртгэлтэй ногоон бонд, нийгмийн бонд болон тогтвортой хөгжлийн бондуудын мэдээллийг LuxSE-ийн Luxembourg Green Exchange (LGX) DataHub мэдээллийн санд нийтэлж эхэлсэн байна.

Талууд уулзалтаар ногоон болон тогтвортой санхүүжилтийн бүтээгдэхүүнийг хөгжүүлэх, олон улсын хөрөнгө оруулагчдад хүрэх сувгийг өргөжүүлэх, үнэт цаасны давхар бүртгэлийн боломжийг судлах, зах зээлийн дэд бүтэц, зохицуулалтыг боловсронгуй болгох, хүний нөөцийн чадавхыг бэхжүүлэх чиглэлээр хамтран ажиллахаар тохиролцжээ.

LGX DataHub нь дэлхийн 4,200 гаруй үнэт цаас гаргагчийн 25,000 гаруй ногоон, нийгмийн болон тогтвортой хөгжлийн бондын мэдээллийг нэгтгэсэн сан бөгөөд үнэт цаас гаргахтай холбоотой танилцуулга, хөндлөнгийн үнэлгээ, татан төвлөрүүлсэн хөрөнгийн зарцуулалтын төлөвлөгөө, нөлөөллийн тайлан, гүйцэтгэлийн гол үзүүлэлт, зорилтот түвшин зэрэг мэдээллийг багтаадаг. Иймд тогтвортой санхүүгийн хэрэгсэлд хөрөнгө оруулдаг хөрөнгө оруулагчдын ашигладаг голлох мэдээллийн санд тооцогддог аж.

МХБ-д бүртгэлтэй ногоон, тогтвортой хөгжлийг дэмжих бондуудын мэдээллийг LGX DataHub-д байршуулснаар дотоодын үнэт цаас гаргагчдын мэдээлэл олон улсын хөрөнгө оруулагчдад илүү хүртээмжтэй болж, олон улсын хөрөнгө оруулалтыг нэмэгдүүлэх ач холбогдолтой юм.