Маск завсрын сонгуульд 276 сая доллар зарцуулж, тэргүүлэгч хандивлагч болжээ

Конгрессын завсрын сонгуульд Бүгд Найрамдах намын олонхыг хадгалахын тулд Илон Маск долдугаар сараас хойш 276 сая гаруй доллар зарцуулж, энэ сонгуулийн хамгийн том хандивлагч болжээ. Энэ мэдээллийг New York Times сонин анх нийтэлснийг Маскийн super PAC байгууллагын хэвлэлийн төлөөлөгч Эндрю Ромео баталсан байна.

Санхүүжилтийн дотор Сенатад өрсөлдөж буй Бүгд Найрамдах намын нэр дэвшигчдийг дэмждэг Senate Leadership Fund-д олгосон 158 сая доллар багтжээ. Энэ нь Америкийн түүхэн дэх хамгийн том улс төрийн хандивын нэг гэж үзэж байна.

Түүнчлэн Маск өөрийн үүсгэн байгуулсан America PAC байгууллагад 76 сая доллар шилжүүлсэн нь тогтоогдсон. Уг байгууллага 2024 онд Дональд Трампыг ялахад туслахын тулд айл өрхөөр явж сурталчилгаа хийх замаар сонгогчдын ирцийг нэмэгдүүлэх ажиллагаа явуулж байсан бөгөөд энэ удаа ч мөн адил арга хэмжээ зохион байгуулжээ.

Мөн Техас мужаас Сенатад өрсөлдөж буй Бүгд Найрамдах намын нэр дэвшигч Кэн Пакстоныг дэмждэг Lone Star Liberty PAC байгууллагад Маск 10 сая доллар хандивласан байна. Техас муж энэ сонгуулиар Маскийн хамгийн их анхаарал хандуулж буй өрсөлдөөний талбар ажээ.

Өнгөрсөн оны тавдугаар сард Маск улс төрийн зорилгоор зарцуулах хөрөнгөө танахаар төлөвлөж буйгаа мэдэгдэж байсан ч одоо эсрэгээр эргэсэн байна. Тэр үед "Би улс төрд хангалттай зүйл хийсэн гэж бодож байна" хэмээн залхсан өнгөөр мэдэгдэж байжээ.

Их хэмжээний хөрөнгө зарцуулж буй ч Маск олны өмнө гарах нь харьцангуй бага байна. Өмнө нь тэр Трамптай хамт сонгуулийн сурталчилгааны арга хэмжээнд оролцож, тайзан дээр гарч байсан бол ерөнхийлөгчийн хоёр дахь бүрэн эрхийн хугацааны эхэн үед засгийн газрын үр ашгийг дээшлүүлэх агентлагийг удирдаж байв.

Маск засгийн газрын албан тушаалаа орхих үедээ Трамптай зөрчилдөж байсан ч хожим эвлэрсэн. Өнгөрсөн долоо хоногт Трамп шинжлэх ухааны үндэсний медалиар Маскийг шагнасан байна.

Маскийн хөрөнгийн хэмжээ энэ онд хувьцааны үнийн өөрчлөлтөөс шалтгаалан их наяд долларын босго орчимд хэлбэлзэж байсан ч өнгөрсөн долоо хоногт дахин 1 их наяд долларыг давсан тухай Forbes сэтгүүл мэдээлжээ.

Энэ сонгуулиар Бүгд Найрамдахчууд Ардчилсан намынхантай харьцуулахад санхүүгийн хувьд маш том давуу талтай байгаа. Гэхдээ Трампын гүйцэтгэлд сонгогчдын өгч буй тааруу үнэлгээ, амьжиргааны өндөр өртөг, Ирантай хийсэн дайны улмаас өссөн эрчим хүчний үнэ зэрэг нь тус намын хувьд томоохон дарамт болж байна.

"Бүгд Найрамдахчууд энэ сонгуулийг худалдаж авахыг хүсэж, олон арван сая долларыг нэр хүндгүй нэр дэвшигчид, нэр хүндгүй ерөнхийлөгч, нэр хүндгүй эдийн засгаа авч гарах уралдаанд цацаж байна"

гэж Ардчилсан намын Сенат дахь хорооны хэвлэлийн төлөөлөгч Лорен Фрэнч хэлжээ.