Малибу дахь Николас Кэйжийн гэрийн ойролцоо зам цөмөрч, 9 метрийн нүх үүджээ

Калифорния мужийн өмнөд хэсэгт сүүлийн хэдэн өдөр аадар бороо орсны улмаас Малибу хотын суурьшлын бүсэд авто зам цөмөрч, 9 метр орчим хэмжээтэй том нүх үүссэн гэж Нью-Йорк Таймс мэдээлсэн байна.

Нүх нь нэгэн амины орон сууцны залгаа зам дээр үүссэн бөгөөд тус орон сууцыг 2024 онд жүжигчин Николас Кэйж худалдан авсан гэж уг сонин мэдээлжээ.

«Leaving Las Vegas» киногоор Оскарын шагнал хүртэж, «Gone in 60 seconds», «Face/Off», «Con Air» зэрэг киногоороо алдаршсан Кэйжийн гэрийн ойролцоо цөмрөлт үүссэн талаар оршин суугчид Даваа гарагт мэдээлж эхэлсэн байна.

«Тэр үед бид тийм их санаа зовоогүй. Амархан засах боломжтой гэж бодож байлаа. Гэвч удалгүй маш том нүх үүссэн» гэж нэгэн оршин суугч Los Angeles сэтгүүлд ярьсан байна.

Мягмар гарагийн өглөө эрт замын цөмрөлт улам өргөжиж, цөмрөлтийн улмаас шугам эвдэрч хий алдагдсаныг онцгой байдлын албан хаагчид засварлажээ.

Малибу хотын захиргаа нүх үүссэн гудамжны таван орон сууцны орц гарцыг «хүн зорчиход аюултай» гэж дүгнэсэн байна.

Энэхүү цөмрөлт нь далайд дэгдсэн Мари хар салхины улмаас Калифорни мужийн өмнөд хэсэгт үер усны түгшүүр зарласны дараа бий болжээ. Уг хар салхи одоогоор эх газраас хол байгаа ч далайн давлагааг эрчимжүүлж, олон өдөр үргэлжилсэн усархаг бороо ороход хүргэж байна.

Эх сурвалж: BBC