Мадрид хотод түрээсийн байрнаас хөөгдсөн 87 настай эмэгтэйг дэмжиж жагсаал болов

Испанийн нийслэл Мадрид хотод бямба гарагт орон сууцны түрээслэгчдийн эрхийг хамгаалах зорилгоор олон мянган хүн оролцсон жагсаал боллоо.

Энэ долоо хоногийн эхээр 87 настай эмэгтэйг насаараа амьдарч байсан түрээсийн байрнаас нь албадан гаргасан нь Испанийн нийгмийг цочроосон. Цагдаа нар хаалгыг эвдэн орж, Марикармен Абаскал хэмээх эмэгтэйг дамнуурга дээр зөөвөрлөн гаргаж буй дүрс бичлэг, зураг нийгмийн сүлжээнд тархсан. Тухайн үед сайн санаат хүмүүс цагдаа нарт саад хийхийг оролдсон ч үр дүнд хүрээгүй.

Энэ хэрэг 2027 онд болох парламентын сонгуулийн өмнө орон сууцны хямралыг олон нийтийн анхаарлын төвд оруулж байна.

Жагсагчид Мадридын төвөөр алхахдаа гэрийн түлхүүрээ шажигнуулан, шүгэл үлээж, орон сууцны үнийн өсөлтийг хязгаарлах, албадан нүүлгэлтийг өндөр босготой болгохыг шаардсан уриа, зурагт хуудас барьсан байв. Нэгэн зурагт хуудсанд «Та ч бас дараагийн Марикармен болж болзошгүй» гэж бичжээ.

Засгийн газар жагсаалд 25,000 орчим хүн оролцсон гэж мэдээлсэн бол зохион байгуулагчид 300,000 хүрсэн гэж үзэж байна.

«Марикармены албадан нүүлгэлт нь олны дургүйцлийг төрүүлж, нөхцөл байдлыг өөрчлөх эргэлтийн цэг боллоо» гэж Мадридын Түрээслэгчдийн Холбооны хэвлэлийн төлөөлөгч Алисиа дел Рио сэтгүүлчдэд хэлжээ.

Испанийн орон сууцны хямралын бэлэг тэмдэг болсон Марикармен Абаскал жагсаал эхлэхээс өмнө цахим орчинд видео мэдэгдэл гаргаж, тэмцэлд нэгдэхийг испаничуудад уриалсан.

«Надад тохиолдсон явдал бусад хүмүүс давтагдахгүй байхад тус болоосой гэж би хүсэж байна. Энэ явдал хүмүүст тэмцэх урам зориг өгч, намайг гэрээс минь албадан нүүлгэх боломж олгосон хууль тогтоомжийг өөрчлөхөд хүргэнэ гэдэгт найдаж байна» гэж тэр албадан нүүлгэлтийн дараа эмнэлгээс мэдэгдсэн байна.

Үйлдвэрчний эвлэлийн мэдээлснээр Марикармены 70 жилийн турш амьдарсан байрыг үл хөдлөх хөрөнгийн компани худалдаж авсныхаа дараа түрээсийн төлбөрийг 275 хувиар өсгөж, сарын 2,650 евро болгосон. Үүний улмаас тэр цаашид амьдрах аргагүй болсон.

Боломжийн үнэтэй орон сууц олох хэцүү байгаагаас ахмадууд түрээсийн байрнаасаа хөөгдөж, залуучууд эцэг эхийнхээ гэрээс тусдаа гарч чадахгүй байгааг 76 настай жагсагч Арнедо хэвлэлд ярьжээ.

«Бид орон сууцны үнэ болон түрээсийн төлбөр буурахыг хүсэж байна. Учир нь би 53 настай хүүгийнхээ дотуур хувцсыг угаахаас залхаж гүйцлээ» гэж тэр хэлсэн.

Өнгөрсөн онд орон сууцны асуудлыг засгийн газрынхаа тэргүүлэх чиглэл болгохоо амлаж байсан Социалист намын ерөнхий сайд Педро Санчес одоо олон нийтийн зүгээс нэлээд дарамт шахалтад орж байна. Тэрбээр Абаскалыг албадан нүүлгэсэн явдлыг «бидний хүлээн зөвшөөрөх боломжгүй нийгмийн эмгэнэлт явдал» гэж нэрлэжээ.

Засгийн газар дараагийн хуралдаанаараа түрээсийн гэрээг автоматаар сунгах, албадан нүүлгэхэд нэмэлт хязгаарлалт тогтоох зэрэг арга хэмжээг багтаасан «Марикармены Тогтоол» хэмээх баримт бичгийг баталж магадгүй. Гэвч Санчесын нам парламентад олонх болж чадаагүй тул уг баримт бичиг батлагдах эсэх нь тодорхойгүй. Энэ оны эхээр үүнтэй төстэй хуулийн төсөл дэмжлэг аваагүй ч энэ удаа Абаскалын хэрэг улс төрийн намуудыг арга хэмжээ авахад түлхэц болж магадгүй.

Испанийн төв банкны тооцоолсноор орон сууцны эрэлт, нийлүүлэлтийн зөрүү их байгаагаас 50 орчим сая хүн амтай тус улсад 700,000 орон сууц дутагдалтай байна. Түрээсийн төлбөр өсөхөд аялал жуулчлал, цагаачлалтай холбоотой хүн амын өсөлт гол нөлөө үзүүлж байгааг ажиглагчид үзэж байна.