М.Мандхай: 4.4 их наяў төгрөгийг хянах түр хороо байгуулна

ХХААХҮ-ийн салбарт төрөөс олгосон санхүүжилтийн Ерөнхий хяналтын сонсгол Байнгын хорооны гишүүдийн ирц бүрдээгүйн улмаас үргэлжлэх боломжгүй болсон талаар Байгаль орчин, хүнс, хөдөө аж ахуйн байнгын хорооны дарга М.Мандхай мэдэгдэв.

Тэрээр ХХААХҮ-ийн салбарт сүүлийн 18 жилийн хугацаанд улсаас зарцуулсан төсвийн хэрэгжилтийг олон нийтэд нээлттэй мэдээлэх зорилгоор ерөнхий хяналтын сонсголыг зарласныг дурдав. Өмнөх өдөр төрийн дэмжлэг, урамшууллын талаар мэдээлэл хүргэсэн бөгөөд өнөөдөр зээлийн хүүгийн татаасны талаар сонсгол үргэлжлэх байсан аж.

Ажлын хэсэг, хөндлөнгийн шинжээчид 157 хоног ажилласан боловч том эрх ашгийн өмнө хүчин мөхсөдлөө.

Сонсголын явцад нэг регистртэй хоёр өөр компанийн нэршлээр зээл авах, зээлийг зориулалтын дагуу ашиглахгүй байх, хадгаламждаа байршуулаад бэлнээр авах зэрэг олон зөрчил илэрсэн байна.

М.Мандхай улс төржилгүйгээр ард түмний өмнө хэлэлцэх зорилготой байсан ч ирц бүрдээгүйг онцлов. Тэрээр ингээд зогсохгүй гэдгийг мэдэгдэж, ажлын хэсгийн гишүүд үргэлжлүүлэн хэлэлцэж чадаагүй 4.4 их наяд төгрөгийг хэдэн компани юунд зарцуулсныг хянан шалгах түр хороо байгуулна гэдгээ мэдэгдэв.