Лондонгийн хөрөнгийн биржтэй хамтран "Монголын хөрөнгийн зах зээл 2.0" хөтөлбөр хэрэгжүүлнэ

Лондонгийн хөрөнгийн бирж групп (LSEG), "Монголын хөрөнгийн бирж" ХК болон "Үнэт цаасны төвлөрсөн хадгаламжийн төв" ХХК хамтран 2026 оны 09 дүгээр сарын 15-нд "Монголын хөрөнгийн зах зээл 2.0" нэртэй хамтарсан хөтөлбөрийг хэрэгжүүлэхээ албан ёсоор зарласан байна. Уг хөтөлбөр нь технологи, дэд бүтэц болон давхар бүртгэлийн замын зураглалыг багтаасан аж.

Арга хэмжээнд биржийн Гүйцэтгэх захирлын үүргийг түр орлон гүйцэтгэгч Д.Мөнхбат, "Үнэт цаасны төвлөрсөн хадгаламжийн төв" ХХК-ийн Гүйцэтгэх захирал Ч.Тавинжил, Лондонгийн хөрөнгийн биржийн Анхдагч зах зээл хариуцсан удирдлагууд Аюуна Нечаева, Крис Макгахан, түүнчлэн Лондонгийн хөрөнгийн бирж группийн технологийн компанийн удирдлагууд Нанжи Сабиха, Мадука Карунаратне нар оролцжээ.

Хамтарсан хөтөлбөр нь хоёр үндсэн чиглэлд төвлөрөх юм:

• Технологи, дэд бүтцийн шинэчлэл: Үнэт цаасны арилжаа, хяналт, төлбөр тооцоо, хадгаламж болон зах зээлийн бусад суурь дэд бүтцийг шинэчлэн, найдвартай, үр ашигтай тогтолцоог бэхжүүлэх;
• Давхар бүртгэл ба олон улсын зах зээлд нэвтрэх боломжийг нэмэгдүүлэх: Монголын тэргүүлэх компаниудыг дотоодын болон олон улсын хөрөнгийн зах зээлээс санхүүжилт татахад дэмжлэг үзүүлж, давхар бүртгэл хийх боломжийг өргөжүүлэх.

"Монголын хөрөнгийн зах зээл 2.0" хөтөлбөр нь Монголын хөрөнгийн зах зээлийн дараагийн үе шатны хөгжлийн суурийг тавьж, технологийн шинэчлэл, олон улсын интеграци, давхар бүртгэл болон хөрөнгө оруулалтын урсгалыг нэг стратегийн хүрээнд уялдуулсан урт хугацааны хамтын ажиллагааны замын зураг болох аж.