Ламын дуулианы улмаас Тайландын ерөнхий сайдын $90,000-ын сахиус шүүмжлэлд өртжээ

Тайландын цагдаа нар хийдийнхээ хөрөнгийг хувьдаа завшсан хэргээр Буддын шашны өндөр мяндагтан ламыг өнгөрсөн долоо хоногт баривчилсан. Мөн тэрбээр луйврынхаа хамсаатан эмэгтэйтэй бэлгийн харилцаатай байсан нь илэрчээ.

Алдартай сахиус урлаач байсан уг лам нь борлуулалтын орлого болон хийдийн засварын хандив болох нийт 3 сая орчим ам.доллартой тэнцэх мөнгийг хувьдаа завшсан гэж буруутгагдаж байна.

Түүний урласан сахиусыг өмнө нь зүүж гайхуулж байсан Тайландын ерөнхий сайд Анутин Чарнвиракул энэхүү дуулианы улмаас хүчтэй шүүмжлэлд өртөж эхэлжээ.

2023 оны аравдугаар сард тухайн үед шадар сайд бөгөөд дотоод хэргийн сайдаар ажиллаж байсан Чарнвиракул намынхаа гишүүдтэй хамт олон нийтийн арга хэмжээнд оролцож байхдаа сэтгүүлчдэд зүүсэн сахиусаа үзүүлж, үүнийгээ Тайландын “зөөлөн хүч”-ний нэг жишээ хэмээн гайхуулж байсан гэнэ.

Түүний зүүж явсан сахиус нь 2006 онд алтаар бүтээгдсэн, хувь заяаг даагч гэгддэг ховор шүтээн бөгөөд ойролцоогоор гурван сая батын (90,700 ам.доллар) үнэтэй байжээ. Сахиусыг Тайландын Аюуттая мужийн Ват Путтаисаван хийдэд бүтээсэн байна.

Тус хийдийн хамба лам 66 настай Пра Вачираян Ви өнгөрсөн Пүрэв гарагийн өглөө баривчлагдсан. Мөн түүнтэй дотно харилцаатай байсан гэгдэж буй 47 настай Пуняави Рунгруанг хэмээх эмэгтэйг баривчилжээ.

Ламын хувийн өрөөний хяналтын камерт тэдний хоолны ширээн дээр бэлгийн харилцаанд орж буйг харуулсан дүрс бичлэг илэрсэн. Хамба ламынхаа “ёс зүйгүй байдлыг тэвчих боломжгүй” болсон хийдийн лам нар дээрх бичлэгийг цагдаагийн байгууллагад хүлээлгэн өгсөн гэж эх сурвалж мэдээлсэн.

Сэжигтэн эмэгтэй ламтны завшсан мөнгийг өөрийн банкны дансаар дамжуулан зарцуулдаг байсан нь мөрдлөгийн явцад тогтоогдсон. Цагдаа нар ламын хууль бус үйл ажиллагааны талаар нэрээ нууцалсан иргэнээс хүлээж авсан мэдээллийн мөрөөр уг хэргийг долдугаар сараас шалгаж эхэлсэн байна.