Л.Хосбаяр: АТГ надаас тайлбар авсан, яллагдагчаар татаагүй

Нийслэлийн замын төсөл, хөтөлбөр эрчимжүүлэх төслийн зохицуулагч Л.Хосбаярыг Авлигатай Тэмцэх Газар шалгаж, гэр болон ажлын байранд нь нэгжлэг хийсэн гэх мэдээлэл гарсан. Тэрээр энэ талаар өнөөдөр «Шинэ үеийн Улаанбаатар» бодлогыг танилцуулах хэвлэлийн хурлын үеэр сэтгүүлчдийн асуултад хариуллаа.

Л.Хосбаяр 2023 оны аравдугаар сард нийслэлийн Засаг дарга Х.Нямбаатартай хамтран ажиллахаар нийслэлд ирсэн бөгөөд энэ хугацаанд Улаанбаатар хотын төсөв санхүүтэй холбоотой зохицуулагчаар ажилласан гэдгээ хэлэв.

Түүний тайлбарласнаар, Засгийн газраас 2026 оны тавдугаар сард нийслэлийн 2025, 2026 оны төсөв болон 24 мега төслийн хэрэгжилтэд ямар алдаа дутагдал байгааг шалгах томоохон ажлын хэсгийг Авлигатай Тэмцэх Газарт байгуулсан. Энэ хүрээнд ажил эрхэлж байсан хүний хувьд түүнийг дуудаж асуух эрх тус байгууллагад бий тул АТГ-аас дуудсан гэж тэрээр тайлбарлав.

«Эрхэлж байсан ажлынхаа хүрээнд би тодруулгаа өгсөн. Өнөөдрийн байдлаар яллагдагч, хэрэгтэн сэжигтнээр, та бүгдийн асууж байгаа шиг Эрүүгийн хуулийн 22.1-т заасан ангиллаар татагдсан зүйл байхгүй» гэлээ.

Тэрээр цааш нь: «Миний хувьд төрийн жинхэнэ албанаас улс төрийн албан тушаалд сонгогдож ирсэн. Төрийн жинхэнэ албан хаагчийн тангараг өргөж 20 гаруй жил ажиллаж байгаа хүний хувьд хуулийн хүрээнд үнэн шударгаар ажиллаж байсандаа эргэлзэхгүй байна. 24 мега төслийн санхүүжилтийг босгохыг би хариуцаж байсан учраас ямар төсөл дээр ямар шугамаар мөнгө босгосныг асуусанд тайлбар өгч байгаа» гэж хэлсэн.

Л.Хосбаяр нь хотын өмнөх даргын үед Нийслэлийн Санхүү, эдийн засаг, бүтээн байгуулалтыг эрчимжүүлэх төсөл хөтөлбөрийн зохицуулагчаар ажиллаж байв.