Киев дахь Kyivstar компанийн төв байр Оросын агаарын цохилтод өртлөө

Украины хамгийн том үүрэн холбооны оператор Kyivstar компанийн Киев дэх төв байр ням гарагт Оросын агаарын цохилтод өртжээ. Хүний амь нас эрстээгүйг тус компаниас мэдээлсэн байна.

Мөн өдөр ОХУ-ын батлан хамгаалах яам Украины хоёр дахь том оператор Vodafone Ukraine компанийн дата төвд довтолсноо зарласан.

Ням гарагийн өглөө Киев хотод байрлах дата төв хоёр удаа дараалан Оросын агаарын цохилтод өртсөний улмаас хоёр хүүхэд, нэг насанд хүрэгч шархадсаныг Украины ерөнхийлөгч Володимир Зеленский мэдээлсэн.

Өнгөрсөн долоо хоногт Украины харилцаа холбооны дэд бүтцүүдэд чиглэсэн Оросын агаарын цохилтын улмаас интернэтийн үйлчилгээ үзүүлэгчдийн дата төвүүд гэмтэж, Киев болон ойр орчмын бүс нутгийн 100 мянга орчим айл өрхийн үйлчилгээ тасалдсаныг Украины цахим шилжилтийн яам мэдээлжээ.

Орос улс мэдээллийн урсгалыг тасалдуулах зорилгоор Украины томоохон дата төвүүдийг онилж байна. Пуужин болон дроны аюулын талаарх шуурхай сэрэмжлүүлэг нь амин чухал бөгөөд олон хүний амийг авардаг юм

гэж Украины гадаад хэргийн сайд Андрей Сибига сошиал хуудсандаа бичсэн байна.

Эндээс харвал Оросын тал иргэдэд агаарын цохилтын талаар урьдчилан мэдээлдэг системийн ажиллагааг зогсоох зорилготой байгаа бололтой.