KFC-ийн АНУ дахь салбарууд 2027 оноос Coca-Cola худалдаалж эхэлнэ

KFC түргэн хоолны сүлжээ АНУ дахь салбаруудынхаа ундааны түншээр Coca-Cola компанийг сонгож, гэрээ байгуулсан байна. Ингэснээр бараг дөчин жил үргэлжилсэн PepsiCo компанитай хамтран ажилласан түүх өндөрлөж байна.

АНУ-д 3,718 салбартай KFC-тэй хамтын ажиллагаагаа зогсоосон нь PepsiCo-гийн хувьд томоохон цохилт болзошгүй. Тус компани АНУ-д хийжүүлсэн ундааны борлуулалтаа сайжруулахыг зорьж байгаа ч зардлын өсөлт, хэрэглэгчдийн илүү эрүүл сонголт руу шилжих хандлага зэрэг сорилттой тулгарч байна.

PepsiCo компанийн гүйцэтгэх захирал Рамон Лагуарта энэ сарын эхээр өсөлт болон ашгийн хэмжээг сэргээх үйл явц төлөвлөснөөс удаан үргэлжилж байгааг хүлээн зөвшөөрч байв.

PepsiCo нь түргэн хоолны салбарт өргөжин тэлэх зорилгоор KFC сүлжээг 1986 онд худалдан авч байжээ. Хэдийгээр PepsiCo 1997 онд KFC-г өөрийн бүтцээс тусгаарласан ч KFC-г эзэмшигч Yum Brands компанийн ундааны түнш хэвээр үлдсэн юм.

Yum Brands болон PepsiCo компаниуд Taco Bell болон олон улс дахь KFC сүлжээ ресторануудад ундаа нийлүүлэх гэрээгээ саяхан сунгасан. Тэдний мэдээлснээр Taco Bell-тэй байгуулсан гэрээ нь 10 жилийн хугацаатай гэнэ.

Түүнчлэн PepsiCo нь Subway болон Jersey Mike's Subs сэндвичний сүлжээнүүдтэй ундааны түншлэлийн гэрээтэй ажилладаг. Тус компани Pizza Hut сүлжээний ундааны нийлүүлэлтийг хариуцдаг бөгөөд Pizza Hut энэ жил Yum Brands-ийн бүрэлдэхүүнээс гарсан. Харин ундааны нийлүүлэгчээ 2011 онд Coca-Cola-гаас PepsiCo руу сольсон байдаг.

2012 онд PepsiCo нь Dunkin' сүлжээтэй таван жил хамтран ажилласны эцэст тус сүлжээг Coca-Cola-д алдсан юм.

KFC-ийн АНУ дахь салбаруудаар 2027 оны хавар гэхэд Coca-Cola-гийн бүтээгдэхүүнүүд худалдаалагдаж эхлэхийг тус компани мэдэгдсэн. Хамтын ажиллагааны санхүүгийн нөхцөлүүдийн талаар дэлгэрэнгүй мэдээлэл өгөөгүй байна.

Coca-Cola нь McDonald's болон Wendy's зэрэг бургерын сүлжээнүүдийн ундааны урт хугацааны түнш юм.