Канад Европын Холбооны "түншлэгч гишүүн" болох боломжийг судалж байна

Канадын ерөнхий сайд Марк Карни Европын Холбоотой илүү нягт харилцаа тогтоохыг зорьж, бүр "түншлэгч гишүүн"-ээр элсэх боломжийг судалж байгааг Уоллстрит Журнал сонин Ням гарагт мэдээлсэн байна.

Европын Холбоо гишүүнчлэлийн асуудалд хатуу ханддаг бөгөөд ийм статус одоогоор байхгүй ч Канадтай илүү ойртон түншлэх санааг хүлээн авахад бэлэн байгааг албаны эх сурвалжуудад үндэслэн тус сонин бичжээ.

Канад, АНУ-ын хооронд үргэлжилж буй худалдааны дайн Оттавагийн эрх баригчдыг стратегийн чиглэлээ өөрчилж, бусад түншүүдтэйгээ ойртоход хүргэж байна. АНУ-ын ерөнхийлөгч Дональд Трамп өнгөрсөн онд Цагаан ордонд буцаж ирснээсээ хойш хойд хөрш Канадтай харилцаагаа эрс муутгаж, хамгийн сүүлд талууд харилцан олон арван тэрбумын дүнтэй бараа бүтээгдэхүүнд импортын өндөр татвар ногдуулсан.

Канад болон Европын Холбоо эрчим хүч, хиймэл оюун ухаан, батлан хамгаалах, чухал ашигт малтмалын зэрэг стратегийн салбаруудын бараа бүтээгдэхүүн, үйлчилгээ, ажиллах хүчний шилжилт хөдөлгөөнийг чөлөөлөх боломжийг хэлэлцэж байгаа аж.

Мөн талууд далай доогуур кабель татах, дата төв, үүлэн технологи, хиймэл дагуулын шинэ сүлжээ хамтран байгуулах, Канадын эрчим хүчийг Европын Холбоонд нийлүүлэх дэд бүтцийг бий болгох талаар хэлэлцэж байгааг эх сурвалж мэдээлжээ.

Францын ерөнхийлөгч Эммануэл Макрон Канадын ерөнхий сайд Марк Карнитай хамтын ажиллагааны асуудлаар илүү ойр ойрхон уулзаж байгаа бөгөөд тэд есдүгээр сарын 20-нд Атлантын далайн Канадын эрэгт ойр оршдог Францын харьяа Сэйн-Пьер ба Микелоны бүлэг арлууд дээр уулзахаар төлөвлөжээ.

Энэ уулзалт нь Канадын ерөнхий сайд түүхэндээ анх удаа эдгээр арлууд дээр хөл тавьсан тохиолдол бөгөөд "хоёр улсын бат бэх харилцааны илэрхийлэл" болж буйг Элиссейн ордноос мэдэгдсэн байна.