Испанид түрээсийн байрнаас албадан нүүлгэхийг 2030 он хүртэл хориглох шийдвэр гаргав

Испанийн эвслийн засгийн газар орон сууцны хямралыг шийдвэрлэх хүрээнд иргэдийг түрээсийн байрнаас албадан нүүлгэхийг 2030 он хүртэл хориглох шийдвэр гаргасан байна.

Энэ шийдвэр нь өнгөрсөн долоо хоногт албадан нүүлгэгдсэний дараа иргэдийн эсэргүүцлийн хөдөлгөөн өрнөхөд хүргэсэн 87 настай эмэгтэй гэртээ буцаж орох саналыг хүлээн авсан үетэй давхцаж байна.

Марикармен Абаскал гэх эмэгтэй түрээсийн төлбөрөө төлж чадалгүй олон жил амьдарсан орон сууцнаасаа дамнуургаар гаргагдаж, Лхагва гарагт Мадридын гудамжинд олон зуун хүн жагсжээ. Мягмар гарагт тэд хотын төв талбайнуудын нэгэнд цугларсан хэвээр байв.

Жагсагчид түрээсийн төлбөрийг царцаах, төлбөрийг огцом нэмэхгүйгээр түрээсийн гэрээг автоматаар сунгах зэрэг хууль эрх зүйн шинэчлэл хийхийг шаардсан байна.

Эрүүл мэндийн сайд Моника Гарсиагийн мэдэгдсэнээр эрх баригч Социалист нам болон эвслийн түнш "Сумар" нам Мягмар гарагт шинэ арга хэмжээний багц дээр тохиролцжээ. Үүнд түрээсийн гэрээг 2028 он хүртэл сунгах, орон сууцны зах зээл дээрх "тас шувууны сан" (vulture funds) гэгддэг түрэмгий хөрөнгө оруулалтын сангуудын үйл ажиллагааг хориглох зэрэг багтжээ.

Гэвч цөөнхийн засгийн газар хуваагдмал парламентаас дэмжлэг авах хүнд сорилттой тулгарч байна.

Орон сууцжуулалтын сайд Изабел Родригес хэвлэлийн хурлын үеэр "тас шувууны сан"-гийн тодорхойлолтыг зөвхөн томоохон хувийн хөрөнгө оруулалтын сангаар хязгаарлахгүй, ашиг хонжоо хайж орон сууц худалдан авдаг аливаа сан, компанид хамааруулан өргөжүүлэхээр зорьж байгааг мэдэгдэв. Тэр Абаскалыг албадан нүүлгэсэн жижиг компани "Urbagestion"-ийг энэ ангилалд багтаж болзошгүй жишээ болгон дурдсан байна.

"Urbagestion" компани тайлбар өгөх хүсэлтэд одоогоор хариу өгөөгүй байна.

Тус компани Абаскалын сүүлийн 40 орчим жил амьдарч буй байрыг худалдаж авсныхаа дараа түрээсийн төлбөрийг огцом нэмсэн юм.

Засгийн газар эдгээр арга хэмжээг хоёр тусдаа тогтоолд хувааж, Баасан гарагт парламентаар хэлэлцүүлэн санал хураахаар төлөвлөж байгаа бөгөөд ихэнх нь эхний тогтоолд багтах аж. Гэрээг автоматаар сунгах асуудал буюу "санал нэгдэхэд хамгийн хүндрэлтэй асуудал" хоёр дахь тогтоолд тусгагдсаныг нийгмийн асуудал эрхэлсэн сайд Пабло Бустиндуй хэвлэлийн хурлын үеэр хэлжээ.

"Олон сая евро эргэлдүүлдэг хөрөнгө оруулалтын сан, тэр дундаа түрэмгий үйл ажиллагаа явуулдаг сангийн мэдэлд байдаг үл хөдлөх хөрөнгөтэй холбоотой албадан нүүлгэн шилжүүлэх ажиллагааг зогсоох шаардлагатай гэдэг дээр бид бүгд санал нэгдсэн" гэж "Junts" намын парламентын бүлгийн хэвлэлийн төлөөлөгч Мириам Ногерас RTVE телевизэд ярьжээ.

"Орон сууц, ресторан эсвэл үл хөдлөх хөрөнгөд өөрсдийн хуримтлалаа оруулсан хүмүүсийг дээрх төрлийн сангуудтай нэг ангилалд багтааж, адилхан авч үзэх нь алдаа юм" гэж тэр нэмж хэлсэн байна.

Мадрид хотын түрээслэгчдийн холбоо засгийн газраас арга хэмжээг хоёр тусдаа тогтоолд хуваасан шийдвэрийг шүүмжилж, Мадрид болон Испани даяар өрнөж буй эсэргүүцлийн ажиллагаа, суултууд шаардлага бүрэн биелэх хүртэл үргэлжлэх бөгөөд цаашид нэмэлт жагсаал цуглаан хийхээр төлөвлөж байгаагаа мэдэгдсэн байна.

Абаскалын өмгөөлөгч Мягмар гарагт түүний орон сууцыг эзэмшдэг "Urbagestion" сан тохиролцох санал тавьсныг мэдээлсэн байна. Тохиролцооны дагуу тэр ирэх найман жилийн хугацаанд тэтгэврийнхээ 30 хувийг (сард ойролцоогоор 500 евро буюу $569) төлөх нөхцөлөөр гэртээ буцаж орох боломжтой болох гэнэ.

Ингэснээр тэр албадан нүүлгэгдэхээсээ өмнөх үетэй ижил хэмжээний түрээсийн төлбөр төлөх ажээ.