Иран өндөр хэрэглээтэй иргэдийнхээ бензиний үнийг нэмэгдүүллээ

Иран улсын засгийн газар иргэдийнхээ бензин шатахууны үнийн бодлогод өөрчлөлт оруулж, өндөр хэрэглээтэй иргэдийн тарифыг хоёр дахин нэмэгдүүлэхээр болжээ. Есдүгээр сарын 8-ны өдрөөс эхлэн гуравдугаар шатлалын тариф литр тутамд 10,000 туман (ойролцоогоор 4.5 ам.доллар цент) болох гэнэ.

Засгийн газрын хэвлэлийн төлөөлөгч Фатеме Мохажерани энэхүү шийдвэрийг зарласан байна. Тэрбээр мэргэжилтнүүдийн уулзалтаас өөр өөр саналууд гарч байсан ч ерөнхийлөгч ард түмэндээ амласан ёсоор тарифыг 10,000 туман дээр тогтоосон гэж хэлжээ. Харин нэг болон хоёрдугаар шатлалын тарифууд хэвээр үлдэх ажээ.

Иран улс газрын тосоор баян ч, цөмийн хөтөлбөртэй холбоотойгоор Өрнөдийн хориг арга хэмжээний улмаас газрын тос боловсруулах хүчин чадал нь буурч, дотоодын зах зээлээ хангаж чадахгүй болоод байгаа юм. Өмнө нь Ираны квотын системд нэг сард худалдаж авсан эхний 60 литр шатахууныг литр тутамд 1,500 туманаар, дараагийн 50 литрийг литр тутамд 3,000 туманаар, түүнээс хойшхийг литр тутамд 5,000 туманаар тооцдог байв.

Иран бол дэлхийд хамгийн хямд бензин хэрэглэдэг орнуудын нэг тул үнийн өөрчлөлт нь улс төрийн эмзэг сэдэв ажээ. Одоогоор Ираны хар зах дээр нэг ам.доллар 2.2 сая гаруй риалтай тэнцэж байгаа бөгөөд АНУ томоохон эдийн засгийн хориг арга хэмжээ авахаар төлөвлөж буй нь риалын ханшийг улам сулруулж, үнийн өсөлтөд нөлөөлж болзошгүй гэж үзэж байна.