Йоханнесбургийн ойролцоо 11 дэх эмэгтэйн цогцос олдлоо

Өмнөд Африкийн цагдаа нар Йоханнесбургаас зүүн зүгт орших Экурхулени хотын задгай талбайгаас Ням гарагт хагас нүцгэн эмэгтэйн цогцсыг илрүүлжээ. Энэ нь долдугаар сарын дунд үеэс хойш тус хотын орчимд олдсон 11 дэх эмэгтэйн цогцос болж байна.

Хамгаалалтын компанийн эргүүлийн автомашин цогцсыг олж харсны дараа цагдаад мэдэгдсэн гэж мэдээлсэн. Үүнээс нэг өдрийн өмнө буюу Бямба гарагт мөн оршуулгын газрын ойролцоогоос хагас нүцгэн эмэгтэйн цогцос олдсон байна.

Олон нийтийн дунд эдгээр аллагыг нэг хүн эсвэл нэг бүлэг үйлдсэн байж болзошгүй гэх айдас тархаж, цагдаа нар хэргүүдийн хоорондын холбоог мөрдөн шалгаж байна. Бямба гарагт олдсон цогцос чулуугаар цохиулсан байж болзошгүйг орон нутгийн цагдаагийн газрын дарга Томми Мтомбени хэлсэн ч үхлийн шалтгааныг нарийвчлан тогтоохоор задлан шинжилгээ хийж байна.

Аллагатай холбоотой байж болзошгүй сэжигтнийг хэргийн газраас бараг 400 км зайтай газраас баривчилсан бөгөөд цуврал аллагын хэргээр саатуулсан хүний нийт тоо дөрөв болжээ.

Өмнөд Африкийн ерөнхийлөгч Сирил Рамафоза орон нутгийн сонгуулийн ажлаар явахдаа 10 дахь хохирогчийн цогцос олдсон тухай мэдээг телевизээр хүлээн авснаа хэлжээ.

«Тембиса дүүргээс эмэгтэй хүний 10 дахь цогцос олдсон тухай мэдээг сонсоод гүнээ харамсаж байна. Манай үзэсгэлэнт оронд эмэгтэйчүүдийн амь насыг хөнөөсөөр байгаа нь эрчүүд бидний хувьд ичгүүртэй хэрэг юм» гэж тэр хэлсэн.

Өмнөд Африк эмэгтэйчүүдийн эсрэг хүн амины хэргийн гаралтаар дэлхийд тэргүүлэгчдийн нэг бөгөөд өдөр бүр дунджаар 15 эмэгтэй алагддаг.

Цагдаа нар долоо, наймдугаар саруудад Экурхулени хотод хоорондоо 6 км зайтай газруудаас гурван эмэгтэйн цогцос олж байсан бол энэ сарын эхээр 10 хоногийн дотор зургаан цогцос нэмж олдсон. Хохирогчид бүгд 20-30 гаруй насныхан бөгөөд ихэнх нь бүтэн болон хагас нүцгэн байдалтай олджээ.

Долдугаар сарын дундуур олдсон эхний цогцос бүрэн нүцгэн, хөл, гар нь кабелиар хүлээстэй байсан бөгөөд уг хэрэгт хохирогчийн найз залууг сэжиглэн баривчилсан ч холбоотойг нь тогтоож чадаагүй байна.