Илон Маскийн экс найз бүсгүй: Тэр нийгмийг зориуд хагаралдуулж байна

Илон Маскийн хүүхдийн эх, экс найз бүсгүй Эшли Сэнт-Клэйр түүнийг нийгмийг зориуд хагаралдуулж байгаа гэдгийг шинэ баримтат кинонд анхааруулжээ. Тэрээр Маскийн X платформ дээрх үйл ажиллагааг үл тоомсорлож болохгүй, энэ нь сүйрэлд хүргэж болзошгүй гэж үзэж байна.

Ахмад найруулагч Алекс Гибнигийн “Маск” нэртэй баримтат кино Венецийн кино наадамд нээлтээ хийсэн. Уг кинонд Сэнт-Клэйр Маскийн “иргэний дайн болохоос өмнө маш олон хүүхэдтэй болох” хүсэлтэйгээ хэлж байсныг дурдсан байна.

Сэнт-Клэйр 2024 онд Маскийн хүүг төрүүлсэн ч хамт амьдраагүй. Маскийн төлөөлөгчид түүнд $40 саяыг нэг удаа төлж, сар бүр $100,000-ын тэтгэлэг төлөх санал тавьж, хариуд нь харилцаагаа нууцлах болзол тавьсан ч хүлээж аваагүй гэдэг.

Венецийн наадмын нээлтийн үеэр Сэнт-Клэйр сэтгүүлчдийн асуултад “Аль нь ч байсан түүний X платформ дээр явуулж буй ажиллагааг үл тоомсорлож болохгүй. Учир нь тэр бодит ертөнцөд байдаггүй галыг асаахыг оролдож байгаа… нийгмийн хуваагдлыг тэр зориудаар бий болгож байна” гэж хариулжээ.

2022 онд Twitter (одоогийн X) платформыг худалдаж авснаасаа хойш Маск хувийн улс төрийн үзэл бодлоо түгээхэд ашиглаж байгаа. Тухайлбал, Даваа гарагт Германы хэт барууны AfD намын ялалтад баяр хүргэж, удирдагчдыг нь магтсан.

Баримтат киног найруулсан Гибни Маскийн соёл иргэншлийн мөхлийн тухай яриа нь Өмнөд Африкт өнгөрүүлсэн хүүхэд насны айдастай холбоотой байж болзошгүйг хэлсэн. Тэрээр “Тэр маш хэцүү, сэтгэл зүйг нь гэмтээсэн хүүхэд насыг туулсан хүн. Хэрэв би сэтгэл зүйч байсан бол тэр айдас түгшүүрээрээ өнөөдөр биднээр тоглож байна гэж дүгнэмээр байна” гэж ярьсан.

Дөрвөн цаг үргэлжилдэг уг баримтат киног бүтээхэд гурван жил зарцуулжээ. “Миний олж мэдсэн зүйл бол Маскийн түүх шинэ технологийн түүх биш. Түүний түүх бол өөртөө итгэлтэй хүн болон хувьцааны хөөсрөлийн түүх юм” гэж Гибни хэлсэн байна.