Их дээд сургууль, коллежийн төгсөгчдийн 26.7 хувь нь бизнес, удирдахуй, хууль эрх зүйн мэргэжилтэй

2025-2026 оны хичээлийн жилийн боловсролын салбарын зарим тоон мэдээллийг Үндэсний Статистикийн Хороо танилцууллаа.

Энэ хичээлийн жилд ерөнхий боловсролын сургуулийг 189.6 мянган сурагч, техникийн болон мэргэжлийн боловсрол сургалтын байгууллагыг 20.6 мянган суралцагч, их дээд сургууль, коллежийг 28.4 мянган оюутан тус тус төгссөн байна.

Дотоодын их, дээд сургууль, коллежийн төгсөгчдийн дийлэнх буюу 26.7 хувь нь бизнес, удирдахуй, хууль эрх зүй, 22.1 хувь нь эрүүл мэнд, нийгмийн халамж, 14.5 хувь нь боловсролын чиглэлээр мэргэжил эзэмшжээ.

Харин техникийн болон мэргэжлийн байгууллагын төгсөгчдийн 55.1 хувь нь инженер, үйлдвэрлэл барилга угсралтын, 23.9 хувь нь үйлчилгээний чиглэлээр төгссөн байна.