Hyrox тэмцээний үеэр өмдөндөө хүндэрсэн Австралийн тамирчин уучлал гуйж, амжилтаасаа татгалзжээ

Бямба гарагт Бээжин хотод зохион байгуулагдсан Hyrox фитнес тэмцээний үеэр Австралийн тамирчин өмдөндөө хүндэрсэн ч уралдаанаа үргэлжлүүлсэн нь олон нийтийн шүүмжлэлд өртжээ.

Уралдааны үеэр авсан бичлэг эрүүл ахуйн маргаан үүсгэж, Hyrox-ийг үүсгэн байгуулагчдын нэг Мориц Фюрсте нөхцөл байдлыг зохицуулж чадаагүйдаа уучлал гуйсан байна.

Пүрэв гарагт гаргасан мэдэгдэлдээ тус тамирчин Жоанна Виетрзик “Миний гаргасан үйлдэл зөвхөн надаар хязгаарлагдахгүй нөлөө үзүүлснийг би ойлгож байгаа бөгөөд үүний улмаас хохирсон бүх хүмүүсээс чин сэтгэлийн уучлал гуйж байна” гэжээ.

Тэрбээр Бээжингийн тэмцээнд түрүүлсэн амжилтаасаа татгалзаж байгаагаа мэдэгдсэн бөгөөд “Бээжингийн уралдааны үеэр болсон явдлын улмаас Хятадын ард түмэн, хамт өрсөлдсөн тамирчид, үзэгчид болон Hyrox-ийн зохион байгуулагчдаас чин сэтгэлээсээ уучлал гуйж байна” гэж бичсэн байна.

“Одоо харахад би замаас гарахаас татгалзсан шийдвэртээ харамсаж байна. Өөр шийдвэр гаргах ёстой байснаа хүлээн зөвшөөрч байна. Уралдаанаа үргэлжлүүлэх шийдвэр гаргасныхаа хариуцлагыг хүлээж, үүнээс үүдэлтэй таагүй байдал, саад бэрхшээл учруулсандаа гүнээ харамсаж байна”

Виетрзик тэмцээн эхлэхийн өмнө “биеийн байдал бүрэн сайн, эрүүл” байсан бөгөөд ямар нэг өвчин тусахыг хүлээх “шалтгаан байгаагүй” гэж тайлбарлажээ.

Hyrox компани “биологийн бохирдлоос сэргийлэх болон эрүүл ахуйн тодорхой дүрэм журам” мөрдөж ажилладгаа илэрхийлсэн ч “урьдчилан таамаглаагүй нөхцөл байдал үүссэнээс дүрэм журмын хэрэгжилт тодорхойгүй болж, тэдгээрийг хэрхэн хэрэгжүүлэх, ойлгох тал дээр эргэлзээ үүссэн” гэж тайлбарласан байна.

Фюрсте ийм явдал дахин гарахаас сэргийлж үйл ажиллагаагаа сайжруулахаа амлаж, Hyrox компани Виетрзикийг сошиал орчинд айлгаж, дарамталсан аливаа хүнийг дараагийн тэмцээнүүдэд оролцуулахгүй байхыг анхааруулжээ.

Hyrox нь нэг километрийн гүйлттэй найман төрлийн дасгалаас бүрддэг фитнесийн тэмцээн бөгөөд 2017 онд Германы Хамбург хотод үүсгэн байгуулагдаж, дэлхий даяар зохион байгуулагддаг. 2024 оны сүүлээр Хятадын эх газарт анхны тэмцээнээ зохион байгуулж байжээ.

Hyrox-ийн дүрэмд “тэмцээний үеэр нулимах, хамраа ухах, хог хаях, усыг буруугаар ашиглах” зэрэг үйлдлийг хориглодог ч Виетрзикт тохиолдсон зүйл дээр яах нь тодорхойгүй байсан бололтой.