Хуситууд Эр-Рияд руу пуужин, дронгоор довтолсноо зарлалаа

Йемений босогч Хусит бүлэглэл Бямба гарагт Саудын Арабын нийслэл Эр-Рияд хотын "амин чухал" байгууламжууд руу пуужин, нисгэгчгүй онгоцоор довтолсноо мэдэгдлээ.

Эр-Риядын гол нисэх буудлын ойролцоо гал гарч, хар утаа олгойдсон бичлэг тарснаас хэдхэн цагийн дараа энэ мэдэгдэл гарчээ.

"Амин чухал" байгууламжууд руу довтолсон гэж Хуситууд мэдэгдсэн ч яг аль байгууламж болохыг тодорхой дурдаагүй. Харин Улаан тэнгисийн эргийн газрын тосны экспортын төв болон Янбу хот дахь төрийн өмчит "Aramco" компанийн байгууламж руу халдсанаа илэрхийлсэн байна.

Тэд уг халдлагыг Йемений нийслэл Санаа руу Саудын Арабын агаарын зэвсэгт хүчин довтолсны хариу арга хэмжээ гэж тайлбарласан.

Саудын тал Хуситуудын халдлагыг албан ёсоор батлаагүй байна.

Бямба гарагт тус улсын эрх баригчид Эр-Рияд болон түүний зүүн талд орших Аль-Харж хотод агаарын довтолгоо болж болзошгүйг иргэдийн гар утсанд анхааруулга илгээсэн. Долдугаар сард Хуситуудын халдлага эрчимжсэнээс хойш анх удаа ийм анхааруулга цацсан байна.

Хөрш Йемений хүн ам шигүү суурьшсан бүс нутаг болон хойд хэсгийн ихэнхийг хянадаг Хусит босогчид долдугаар сараас эхлэн Улаан тэнгист Саудын Арабын эсрэг бүслэлт зарлаж, ачаа тээврийн хөлөг онгоцууд руу довтолж эхэлсэн.

Ормузын хоолойг Иран хаасны улмаас газрын тосны экспортын замаа Улаан тэнгис рүү шилжүүлсэн Саудын Арабт энэ нь том цохилт болж, дэлхий дахины эрчим хүчний хямралыг улам гүнзгийрүүлж байна.

Энэ сард Хуситууд хурдтай довтолсны үр дүнд Йемений Улаан тэнгисийн эрэг дагуух нутаг дэвсгэрийг бүхэлд нь эзэлсэн. Ингэснээр Улаан тэнгисийн хоёр гарцын нэг болох Баб эль-Мандебын хоолой тэдний хяналтад шилжсэн.

НҮБ-ын Аюулгүй байдлын зөвлөл Баасан гарагт гаргасан мэдэгдэлдээ "Хусит бүлэглэлийн Саудын Арабын хаант улсын эсрэг явуулж буй халдлага, тэр дундаа эмэгтэйчүүд, хүүхдүүд зэрэг энгийн иргэд болон эрчим хүчний дэд бүтцийг гэмтээсэн халдлагуудыг эрс хатуу буруушааж" байгааг анхааруулжээ.