Хотын дарга: Энэ жил 10-15 мянган тонн мах нөөцөлнө

Нийслэлийн удирдлага нөөцийн мах бэлтгэх ажлын явц, дүүжин тээврийн төслийн талаар мэдээлэл өглөө. Хотын дарга Б.Пүрэвдагва цаг үеийн асуудлаар тодруулга хийсэн байна.

Тэрбээр энэ жил 10-15 мянган тонн мах нөөцлөхөөр зорьж буйг мэдэгдлээ. Ингэснээр махны үнийг тогтворжуулах боломжтой гэж үзэж байна. Өнгөрсөн жил 5000 тонн мах нөөцөлж байжээ.

9-10 сар нь нөөцийн махны бэлтгэл ажлын үе бөгөөд одоогоор есөн ААН хөнгөлөлттэй зээл авсан байна. Гэвч малын халдварт өвчин гарсантай холбоотойгоо мах нөөцлөхөд тодорхой хэмжээний бэрхшээл тулгарч байгааг хотын дарга онцлов.

Мөн дүүжин тээврийн төслийн үнийн судалгаа хийгдэж байгааг дуулгав. Автобусны үнээс хол зөрүүгүй байхаар зорьж, 12 дугаар сарын 15-нд нэвтрүүлэхдээ үнийг зарлана. Кабин нь халаагчтай бөгөөд өвөл халуунаар, зун хүйтнээр үлээх юм. Одоо дүүжин тээврийн буудлуудыг тохижуулах ажил үлдээд байгаа бөгөөд хүний нөөцийг нээлттэй зарлаж, сонгон шалгаруулна.

Хийн халаагуурын хувьд 5000 айлыг шилжүүлсэн. Хэрэглэж байгаа айлууд тухтай байгаа ч өртөг өндөртэй байгаа тул энэнээс өөр шийдлийг судалж ажиллана гэдгийг хотын дарга хэллээ.