Хөгжлийн бэрхшээлтэй иргэд Төв талбайд жагсаж, сайдыг огцруулахыг шаардаж байна

Хөгжлийн бэрхшээлтэй иргэдийн төлөөлөл Төв талбайд тайван жагсаал хийж байна. Тэд хүний эрхийн мэдрэмжгүй, хөгжлийн бэрхшээлтэй иргэдийг мартсан гэж үзэж буй Гэр бүл, хөдөлмөр, нийгмийн хамгааллын сайд Т.Аубакирыг огцруулахыг Ерөнхий сайд Н.Учралаас шаардаж байна.

Жагсагчид 1992 онд баталсан Үндсэн хуульд иргэнийг үзэл бодол, үнэт зүйл, эр эм, боловсрол, хөгжлийн бэрхшээлтэй байсан ч ялгаварлан гадуурхаж болохгүй гэж заасныг дурдав. Тэдний мэдэгдлээр, хөгжлийн бэрхшээлтэй иргэдийн тэтгэвэр, тэтгэмжийг нэмэгдүүлэх хууль батлахад Т.Аубакир сайд эсрэг санал өгсөн байна.

Хөгжлийн бэрхшээлтэй иргэдийн тэтгэвэр, тэтгэмжийг нэмэгдүүлэх хууль батлахад Т.Аубакир сайд эсрэг санал өгсөн. Энэ хүн хөгжлийн бэрхшээлтэй иргэдийн төлөө ажиллахгүй юм байна. Нийгмийн хамгааллын хууль, дүрмийг хэрэгжүүлэхгүй нь харагдаж байгаа учраас огцруулахыг шаардаж Төв талбайд ирсэн

Жагсагчдын нэг нь ач хүү гуравдугаар ангид сурдаг, дауны өвчтэй гээд хөгжлийн бэрхшээлтэй иргэнийг асран хамгаалахад ар гэрийн зүгээс их хэмжээний зардал гардаг гэв. Мөн Монголчууд МАН-д гурав дараалан үнэмлэхүй олонхын санал өгч, засгийн эрхэд гаргасан ч 38, 30-ын бүлгээр хуваагдаад байгааг шүүмжилж, төр засгаа хямралаас гаргана гээд Монголын төрийг самраад дууслаа гэж хэлсэн.

УИХ-ын гишүүн Ж.Баясгалан хөгжлийн бэрхшээлтэй иргэд төрдөө үгээ хэлэхийн тулд маш их бэрхшээлийг давж ирсэн гэв. Тэрээр Ерөнхий сайд Н.Учралтай таарсан бөгөөд талбай дээр байгаа иргэдийн дуу хоолойг сонсооч ээ, Засгийн газраас өгсөн чиглэлийн эсрэг байсан Т.Аубакир сайдын чинь эсрэг ярьж байна гэж Ерөнхий сайд хэлсэн гэв.

Ж.Баясгалан 110 мянган хөгжлийн бэрхшээлтэй иргэдийг орхиод хаяж буй салбарын сайдтай байх ёсгүй гэж мэдэгдэв. Түүний хэлснээр, Ерөнхий сайд «Би хүлээж авна, хүн хүнийхээ төлөө байх ёстой» гэж хэлсэн. Мөн тоосго, гурил ярьдаг сайд бидэнд хэрэггүй, хүнээ боддог сайд хэрэгтэй, 652 мянган төгрөгийн тэтгэвэр авдаг хүмүүсийг дахиад орхигдуулсан гэж Ж.Баясгалан хэлэв.