Хилийн боомтын үндэсний зөвлөл хуралдаж, 11 асуудал хэлэлцлээ

Хилийн боомтын үндэсний зөвлөл өчигдөр хуралдаж, зөвлөлийн дарга З.Мэндсайхан удирдсан. Хуралдаанаар нийт 11 асуудал хэлэлцсэн.

Гаалийн ерөнхий газрын дарга П.Дэлгэрнаран Монгол Улсын Засгийн газрын 2026 оны 04 дүгээр сарын 29-ний өдрийн 16 дугаар тэмдэглэлийн хүрээнд авч хэрэгжүүлэх зарим арга хэмжээний талаар танилцуулсан. Хилийн боомтын захиргааны дарга Э.Гантулга Өмнөговь аймгийн Ханбогд сумын нутаг дэвсгэрт орших хилийн Гашуунсухайт боомт дахь Чингэлэг тээврийн терминалыг өргөтгөх эсэх тухай тогтоолын төслийг танилцуулж, холбогдох яамд болон байгууллагаас санал авахыг Сангийн сайд даалгасан.

Мөн хуралдаанаар «Монгол, Хятадын хилийн хамтарсан комиссын 7 дугаар хуралдаан»-ы үр дүнгийн талаар Гадаад харилцааны яамнаас танилцуулсан.

Түүнчлэн хилийн Гашуунсухайт боомтод ажиллах төрийн тусгай албан хаагчдын байрлах байрны асуудал болон боомтын хөгжлийн ерөнхий төлөвлөлттэй танилцсан. Дараа нь хилийн боомтын эрх зүйн байдлыг зохицуулах тандан судалгаа хийх, хуулийн төсөл боловсруулах ажлын хэсэг байгуулах эсэх тухай, Монгол, Хятадын хилийн «Даян-Хуншанзюй», «Баянхошуу-Өвдөг», «Сүмбэр-Рашаан» боомтын хилийн голын гүүрний тухай, Тээвэрлэлтийн үйл ажиллагааг зохицуулах «Хилийн боомтод мөрдөх нийтлэг журам»-ыг боловсруулах ажлын хэсэг байгуулах эсэх тухай, Хилийн Шивээхүрэн боомтын хөгжлийн ерөнхий төлөвлөлтийг батлуулах эсэх тухай, Хилийн Байтаг боомтын хэсэгчилсэн ерөнхий төлөвлөлтийн хязгаар, байршлыг тогтоохтой холбоотой зарим арга хэмжээний тухай төслүүдийг хэлэлцэж, зөвлөлийн гишүүдээс санал авч, тодруулах шаардлагатай асуудлын хүрээнд санал солилцсон.

Дээрх асуудлуудын хүрээнд холбогдох яамдаас санал авч, Засгийн газрын хуралдаанд танилцуулга бэлтгэхийг Сангийн сайд бөгөөд Хилийн боомтын үндэсний зөвлөлийн дарга З.Мэндсайхан Хилийн боомтын захиргаанд үүрэг болгосон.