ХХБ НҮБ-ын Цөлжилттэй тэмцэх конвенцын COP17-д оролцож, олон улсын зөвлөлд элсэв

НҮБ-ын Цөлжилттэй тэмцэх тухай конвенцын Талуудын 17 дугаар бага хурлын (COP17) хүрээнд Худалдаа, хөгжлийн банкны (ХХБ) төлөөлөгчид тогтвортой санхүүжилт, газрын нөхөн сэргээлт, ногоон хөрөнгө оруулалтын чиглэлээр хэрэгжүүлж буй бодлого, санаачилгаа олон улсын түвшинд танилцуулсан.

Бага хурлын үеэр ХХБ-ны төлөөлөгчид уур амьсгалын эрсдэлийн удирдлага, шилжилтийн санхүүжилтийн асуудлаар өндөр түвшний хэд хэдэн арга хэмжээнд оролцож, ногоон хөгжлийн зорилтуудыг хэрэгжүүлэхэд хувийн хэвшлийн оролцоог онцолсон.

COP17-ийн “Finance Day”-ийн хүрээнд ХХБ болон Монголын Бизнесийн Зөвлөл “Бэлчээрийн экосистемийн ногоон шилжилт” санаачилгыг олон улсын оролцогчдод танилцуулсан. Энэхүү арга хэмжээний үеэр газрын нөхөн сэргээлт, тогтвортой мал аж ахуй, ноолуурын үнэ цэнийн сүлжээ болон холимог санхүүжилтийн боломжийн талаар хэлэлцүүлэг өрнөсөн.

Мөн COP17-ийн үеэр ХХБ нь Business4Land санаачилгыг дэмжиж, Business4Land Champions’ Council-ийн гишүүнээр элссэн.

ХХБ нь “Ногоон банк” болох урт хугацааны стратегийн хүрээнд тогтвортой санхүүжилтийн бүтээгдэхүүн, үйлчилгээг хөгжүүлэх, ногоон хөрөнгө оруулалтыг нэмэгдүүлэх, газрын доройтол, цөлжилттэй тэмцэх үндэсний хүчин чармайлтыг дэмжих чиглэлээр олон улсын хамтын ажиллагаагаа бэхжүүлэхээр ажиллаж байна.