ХасБанк III улиралд 50.2 тэрбум төгрөгийн цэвэр ашигтай ажиллалаа

ХасБанк 2026 оны III улиралд 50.2 тэрбум төгрөгийн татварын дараах цэвэр ашигтай ажилласан байна. Ингэснээр өөрийн хөрөнгийн өгөөж (annualized ROE) 20.5 хувь, нэгж хувьцаанд ногдох цэвэр ашиг (annualized EPS) 175.8 төгрөгт хүрчээ.

Улирлын санхүүгийн үзүүлэлтүүд

• Зээл ба санхүүгийн түрээсийн багц 4,850 тэрбум төгрөг болж, өмнөх улирлаас 0.8 хувиар буурсан. Иргэдийн банкны зээл 32 тэрбум төгрөг (1.2 хувь), байгууллагын банкны зээл 50 тэрбум төгрөгөөр (5.3 хувь) буурсан бол бизнесийн банкны зээл 20 тэрбум төгрөг (6.5 хувь), санхүүгийн түрээсийн багц 22 тэрбум төгрөгөөр (2.5 хувь) өссөн.
• Нийт зээлд эзлэх чанаргүй зээлийн хувь өмнөх улиралтай ижил 2.2 хувьд хадгалагдсан.
• Нийт харилцах, хадгаламжийн үлдэгдэл 28.4 хувиар өсөж 5,168 тэрбум төгрөгт хүрсэн. Үүний дотор харилцах дансны үлдэгдэл 77.6 хувиар өсөж 1,916 тэрбум төгрөгт, хадгаламжийн үлдэгдэл 10.4 хувиар өсөж 3,251 тэрбум төгрөгт хүрлээ.
• 2026 оны эхний хагас жилийн цэвэр ашгаас нэгж хувьцаанд 18.0 төгрөгийг ногдол ашиг болгон хувьцаа эзэмшигчдэд тараахаар ТУЗ-өөс шийдвэрлэсэн бөгөөд хувьцаа эзэмшигчдийн ээлжит бус хурлаар батлагдсанаар ногдол ашгийг тараах юм.
• Тайлант хугацаанд Монголбанкнаас тогтоосон зохистой харьцааны шалгуур үзүүлэлтүүдийг бүрэн хангасан. Нэгдүгээр зэрэглэлийн өөрийн хөрөнгө болон эрсдэлээр жигнэсэн активын зохистой харьцаа 18.9 хувь (байвал зохих хэмжээ 12.5 хувь), төлбөр түргэн гүйцэтгэх чадварын харьцаа 43.3 хувь (байвал зохих хэмжээ 25.0 хувь) байна.

Банкны 2026 оны III улирлын Санхүү, үйл ажиллагааны тайлан, санхүүгийн байдлын болон орлого үр дүнгийн тайланг тус банкны цахим хуудаснаас үзэх боломжтой.