ХасБанк 18.9 тэрбум төгрөгийн ногдол ашиг хуваарилна

ХасБанк ХК-ийн хувьцаа эзэмшигчдийн ээлжит бус хурал 2026 оны 09 дүгээр сарын 17-ноос 10 дугаар сарын 09-ний өдрүүдэд цахимаар, эчнээ санал хураалтын хэлбэрээр болж, 76.5 хувийн ирцтэйгээр хүчин төгөлдөр болсон байна.

Хурал 2026 оны эхний хагас жилийн цэвэр ашгаас ногдол ашиг хуваарилах асуудлыг хэлэлцэж, Төлөөлөн удирдах зөвлөлийн саналын дагуу нэгж хувьцаанд 18 төгрөг, нийт 18.9 тэрбум төгрөгийн ногдол ашиг олгохыг эцэслэн шийдвэрлэсэн.

Монголбанкнаас холбогдох зөвшөөрөл олгогдсоны дагуу ХасБанк ногдол ашгийг татвар суутгасны дараах дүнгээр Үнэт цаасны төвлөрсөн хадгаламжийн төв (ҮЦТХТ)-ийн дансанд шилжүүлсэн. ҮЦТХТ ногдол ашгийг ажлын 3 хоногт багтаан хувьцаа эзэмшигчдийн нэрийн дансанд байршуулна.

Ногдол ашиг нь ээлжит бус хуралд оролцох эрхтэй хувьцаа эзэмшигчдийг тогтоох бүртгэлийн өдөр буюу 2026 оны 09 дүгээр сарын 14-ний байдлаар ХасБанк ХК-ийн хувьцааг эзэмшиж буй иргэн, хуулийн этгээдэд олгогдох бөгөөд дэлгэрэнгүй мэдээллийг хувьцаа эзэмшигчид өөрийн харилцдаг үнэт цаасны брокер, дилерийн компаниас авах боломжтой.