Хар тамхи 10 жил хэрэглэсэн иргэн: Онлайн дэлгүүрээс захиалах нь хувцас захиалахаас ч амархан болсон

Мансууруулах бодис худалдаж авч хэрэглэсэн 10 гаруй жилийн туршлагатай нэгэн иргэн хар тамхины далд сүлжээний тухай редакцад ярилцлага өгсөн байна. Тэрбээр хувийн мэдээллээ нууцлахыг хүсч, энэ чиглэлийн далд наймаа, сүлжээ, оролцогчдыг илчлэх зорилгоор хэвлэлд хандсанаа мэдэгдсэн юм.

Түүний яриагаар бол 2016 онд найзуудтайгаа нийлж хар тамхи хэрэглэж эхэлсэн бөгөөд хар тамхи хэрэглэгчид хөнгөнөөс хүнд рүү шилжих хандлагатай байдаг аж. Нуруу нугасны өвдөлт намдаах эм хэрэглэж байгаад донтсон тохиолдол бий гэж тэр ярьжээ. Тэрбээр 10 жил хэрэглэсний дараа өнгөрсөн арванхоёрдугаар сараас хойш хэрэглэхээ больсон ч бага зэргийн өвдөлттэй хэвээр байгаагаа хэлсэн.

Сүүлийн жилүүдэд онлайн дэлгүүр бий болсноор хар тамхи авах нь өмнөхөөс хамаагүй хялбар болсон гэж тэр тэмдэглэв. Telegram дээр мансууруулах эм, сэтгэцэд нөлөөлөх бодис зардаг дэлгүүрүүд үйл ажиллагаа явуулж байгаа бөгөөд цахим бирж дээр криптовалют авч, дэлгүүрийн данс руу шилжүүлсний дараа барааны байршил, зургийг илгээдэг механизмтай болжээ. Хар тамхийг ихэвчлэн гэр хорооллын хашааны урд эсвэл төмөр хашааны завсарт нуудаг аж.

Телеграмм дээр хар тамхи зардаг онлайн дэлгүүр Монголд үйл ажиллагаа явуулаад нэлээд удаж байгаа. Хүмүүс сайн мэдэхгүй байгаа болохоос энэ асуудал гамшгийн хэмжээнд хүрсэн

Түүний хэлснээр, хуучны үе шиг тусгай хүмүүстэй харилцах шаардлагагүй болж, Telegram руу орсон хэн бүхэн хар тамхи авах боломжтой болсон байна. Сүүлийн үед монголчууд өөрсдөө дэлгүүр ажиллуулж, бүх төрлийн бодис зарж эхэлсэн гэж тэр ярьсан.

Монгол улс хар тамхины аюултай тулгарч байгаа бөгөөд Оросын хар тамхины сүлжээ улсыг дотроос идэж байна гэж тэр үзэж байна. Түүний мэдэж байгаагаар 50-60 мянган хэрэглэгч байгаа бөгөөд яаралтай зогсоохгүй бол улс цаашдаа үйлдвэрлэгч орон болох эрсдэлтэй гэж анхааруулжээ.

Хар тамхийг дагаад их хэмжээний мөнгө яригддаг бөгөөд донтсон хүн хар тамхиа олж авахын тулд залилан, хулгай дээрэм хийх тохиолдол бий гэж тэр хэлэв. Тэрбээр 10 жил энэ амьдрал дунд явсны эцэст эцэг хүн болоод холдсон бөгөөд үр хүүхдийнхээ амьдрах нийгмийн төлөө санаа зовж байгаагаа илэрхийлсэн.

Telegram-ийн нууцлал маш сайн тул хэн зар тавьж байгааг олж мэдэх боломжгүй гэж тэр тайлбарлав. Цаад хүмүүс нь баригддаггүй тул Монгол хүүхдүүдээр туг тахиулж, өөрсдөө цэвэр үлддэг аж. 12, 13 насны хүүхдүүд ажил хийж, мөнгө олъё гэж орчихдог гэж тэр ярьжээ.

Тэрбээр дугуйтай, өсвөр насны 4-5 хүүхэд хар тамхи булааж явааг харсан бөгөөд тэд ямар аюултай зүйл хийж байгаагаа мэддэггүй гэж хэлсэн. Зарим тохиолдолд задлаад хэрэглэж үзсэн байдаг аж. Цагдаа нарт энэ тухай яривал шоронд суулгана гэж тэр айж байгаагаа илэрхийлэв.

Онлайн дэлгүүрээс хувцас захиалахад ачаалалтай үед хоёр хонож ирдэг бол хар тамхи зардаг дэлгүүр мөнгө төлөгдсөнөөс хойш хоёр минутын дотор байршил илгээдэг гэж тэр жишээ татав.

Хар тамхинаас гарахын тулд олон жил үйл тамаа эдэлж, эмнэлэгт хэвтэж үзсэн гэж тэр ярьсан. Монголын эмнэлгүүд архины донтолттой хүний эмчилгээг хар тамхины хамааралтай хүнд хийдэг бөгөөд архины хордлого тайлах шингэн тарих нь үр дүн багатай гэж тэр үзэж байна. Зөвхөн Шар хаданд очиж донтолтын тасагт хэвтэхээс өөр эмчилгээ алга гэж тэр хэлэв.

Түүний нэг танил эмнэлэгт 26 сая төгрөгөөр гурван сарын хугацаанд хар тамхины эсрэг эмчилгээ хийлгэж үзсэн боловч хэвтэж байсан хүмүүстэй мэдээлэл солилцож, эмнэлгийн ариун цэврийн өрөөнд хар тамхи хэрэглэж үзсэн гэсэн. Хар тамхи хэрэглэсэн хүнийг Зөрчлийн тухай хуулиар 30 хоног баривчилдаг ч баривчлагдсан газарт өөр хүмүүстэй холбоо тогтоож, илүү их мэдлэгтэй болж гарч ирдэг гэж тэр ярилаа.