Х.Нямбаатарыг яллагдагчаар татах саналыг АТГ прокурорт хүргүүлжээ

Хотын дарга асан Х.Нямбаатарыг "Туулын хурдны зам төсөл"-тэй холбоотой эрүүгийн хэрэгт яллагдагчаар татах саналыг Авлигатай Тэмцэх Газар гаргаж, прокурорын байгууллагад хүргүүлсэн байна.

Түүнд Эрүүгийн хуулийн 22.1 дүгээр зүйл буюу эрх мэдэл, албан тушаалын байдлаа урвуулан ашиглах гэмт хэрэг үйлдсэн гэх үндэслэлээр яллагдагчаар татах санал тавьсан аж. Прокурорын байгууллага уг саналыг шалгаж, Х.Нямбаатарыг яллагдагчаар татах эсэхийг 72 цагийн дотор шийднэ.

Энэ оны тавдугаар сарын 16-нд Ерөнхий сайд Н.Учрал Х.Нямбаатарыг хотын даргын үүрэгт албан тушаалаас нь чөлөөлж буйгаа мэдэгдсэн. Нийт 2.3 их наяд төгрөгийн төсөвт өртөгтэй "Туулын хурдны зам төсөл"-ийг зогсоосныг одоогийн хотын дарга Б.Пүрэвдагва өнгөрсөн сард зарласан.

Х.Нямбаатар өнгөрсөн дөрөвдүгээр сард "Туулын хурдны замын 500 тэрбум төгрөг хүн бүхэнд оньсого мэт байна. Гүйцэтгэгч компанид гэрээний дагуу банкны баталгаа, олон улсын давхар даатгалын дагуу бид нар шахаж байгаад 500 тэрбум төгрөгийг өгсөн" хэмээн ярьж байлаа.