Х.Баасанжаргал: Хувийн сургуульд 9.8 тэрбум төгрөг төсөвлөсөн нь тэгш бус байдлыг бий болгож байна

Төсвийн тодотголын хүрээнд Хан-Уул дүүргийн хувийн сургуулиудад 9.8 тэрбум төгрөг төсөвлөсөн байна. УИХ-ын гишүүн Х.Баасанжаргал энэхүү төсөвлөлтийг шүүмжилж, тэгш бус байдал үүсгэж байгааг онцоллоо.

Тэрбээр “Төсвийн тодотгол нь үлдсэн гурван сард нэмж зарцуулах мөнгө шаардлагатай болсныг илэрхийлдэг. Хүүхдийн тоо, сургуулийн ачаалал нэмэгдэж байгаа нь ойлгомжтой ч, үүнийг оны эхэнд тооцоолоогүй, харин одоо нэмж оруулж ирж байгаа нь эргэлзээ төрүүлж байна” гэж хэллээ.

Олон улсын хөтөлбөртэй сургуулиудад 3 тэрбум төгрөг

Төсвийн тодотголд олон улсын хөтөлбөртэй гурван сургуульд 3 тэрбум төгрөг нэмж тусгажээ. Х.Баасанжаргал эдгээр сургуулийн багш нарын цалин улсын сургуулийн багш нарынхаас 50 хувиар илүү байгаа нь төр өөрөө боловсролын үйлчилгээний тэгш бус байдлыг бий болгож байгааг дурдаж, нийтлэг боловсролд олон асуудал байхад зөвхөн гурван сургуульд энэ хэмжээний мөнгө олгох нь буруу гэж үзэж байна.

“Гэрт ойр сургууль” хөтөлбөрийн хувьсах зардал

“Гэрт ойр сургууль-хамгийн сайн сургууль” арга хэмжээнд 50 тэрбум төгрөг нэмж тусгасан ч, хувьсах зардлыг зөвхөн Хан-Уул дүүргийн гурван хувийн сургуульд олгож байна. Нэг хүүхдэд ногдох хувьсах зардал 5500 төгрөгөөр бодоход 2.6 тэрбум төгрөг эдгээр сургуульд төсөвлөгдсөн. Харин Баянзүрх, Сонгинохайрхан зэрэг ачаалалтай дүүргүүдэд энэхүү хуваарилалт хийгдээгүйг гишүүн шүүмжилсэн.

Төрөлжсөн сургуулиудын тоног төхөөрөмжид 7 тэрбум төгрөг

Төсвийн тодотголд төрөлжсөн лаборатори сургууль байгуулах, тоног төхөөрөмжийн зардалд зориулж тав, зургаан улсын сургуульд хөрөнгө оруулахаар тусгасан боловч, хоёр хувийн сургуульд 7 тэрбум төгрөгийн тоног төхөөрөмжийн төсөв багтсан байна. Нийтдээ дөрвөн хувийн сургуульд 9.8 тэрбум төгрөг олгох нь сурах бичиг, анги танхимын хүрэлцээ зэрэг салбарын тулгамдсан асуудлуудыг шийдвэрлэхэд зориулагдаагүй, төсвийн тодотголоор нэмж оруулж ирсэн нь шүүмжлэлтэй гэдгийг Х.Баасанжаргал онцолсон.