ГССҮТ: Ховд, Увс, Баян-Өлгийн 0-2 насны хүүхдийн тавхайн төрөлхийн гажгийг эрт илрүүлнэ

Гэмтэл Согог Судлалын Үндэсний Төв (ГССҮТ) “Ротари” олон улсын байгууллагатай хамтран 0-2 насны хүүхдийн тавхайн гажиг хөгжлийн эрт илрүүлгийг Ховд, Увс, Баян-Өлгий аймагт хэрэгжүүлэхээр болжээ. Энэ хүрээнд тус аймгуудын нутаг дэвсгэрт 0-2 насны хүүхдийн тавхайн төрөлхийн гажгийг эрт илрүүлэх үзлэг, тандалт зохион байгуулж, шаардлагатай тохиолдолд оношилгоо, эмчилгээний тусламж үйлчилгээ үзүүлэхээр зорьж байна.

Мөн энэ ажлын хүрээнд орон нутгийн эмч, эмнэлгийн мэргэжилтнүүдийн мэдлэг, ур чадварыг дээшлүүлэх сургалт зохион байгуулах, эцэг эх, асран хамгаалагч нарт эрүүл мэндийн боловсрол олгох, хүүхдийн тавхайн төрөлхийн гажгийг эрт илрүүлэх, оношлох, эмчлэхэд чиглэсэн нэгдсэн удирдамж боловсруулах юм. Монгол Улсад хүүхдийн майга тавхайн гажгийг төрсний дараах үеэс системтэйгээр эрт илрүүлэх үйл ажиллагаа хангалтгүй байгаагаас зарим тохиолдол хожуу оношлогдох эрсдэлтэй. Иймд эрт илрүүлж, цаг хугацаанд нь эмчилгээнд хамруулах нь хүүхдийн хөдөлгөөн, өсөлт хөгжил, амьдралын чанарыг хамгаалахад чухал ач холбогдолтойг ГССҮТ-өөс мэдээлэв.