Гэр хорооллын 6,000-10,000 айлд цахилгаан халаалтын шинэ технологи туршина

Энэ өвлийн улиралд нийслэлийн гэр хорооллын 6,000-10,000 айлд дулаан хураагуурыг цахилгаанаар халаах технологийг турших төлөвлөгөөтэй байна.

Хотын дарга Б.Пүрэвдагвын мэдээлснээр нийслэл оргил цагаар 2,170 МВт, шөнийн цагаар 1,000 МВт цахилгаан хэрэглэж байгаа бөгөөд 170 МВт-ын хүчин чадлын дутагдалтай байна. Үүнтэй холбогдуулан 5-10 МВт-ын жижиг батарей хураагуурыг айл өрх бүрт байрлуулах, мөн 219,000 айл өрхийг цахилгаан эх үүсвэрээр халаах хувилбаруудыг тооцоолж байгааг тэрбээр хэллээ.

Өмнө нь гэр хорооллын 5,000 айл өрхийг хийн зууханд шилжүүлсэн ч өндөр өртөгтэй байсан. Хийн зуухны үнэ 6.5 сая төгрөг бөгөөд үүн дээр айл өрх хийн газ худалдан авч хэрэглэх шаардлагатай. Эдгээр айлд нэг өвлийн турш нийслэлээс 900,000 төгрөгийн урамшуулал олгож байгаа нь урт хугацаанд үргэлжлүүлэх загвар биш гэж үзсэн тул илүү хямд, үр ашигтай хувилбарыг хайж байгааг хотын дарга дурдлаа.

Тэрбээр Улаанбаатар хот дулаан, цахилгаан эрчим хүч болон дэд бүтцийн эрсдэлтэй тул томоохон төслүүдийг яаралтай хэрэгжүүлж дуусгах шаардлагатайг онцлов.