Гараашны татварыг чөлөөлөх хуулийн төсөл боловсруулж, санал авч эхэлжээ

Иргэний өмчлөлийн нэг авто зогсоолыг үл хөдлөх хөрөнгийн албан татвараас чөлөөлөх хуулийн төслийг УИХ-ын гишүүн А.Ганбаатар боловсруулж, есдүгээр сарын 11-нээс УИХ-ын цахим хуудсаар иргэдээс санал авч эхэлсэн байна.

2023 онд Нийслэлийн иргэдийн Төлөөлөгчдийн Хурал нийслэлийн 204 хороог таван бүсэд хувааж, байршлаас хамааруулан 0.6-2.0 хувийн татвар ногдуулж байна. "Үл хөдлөх эд хөрөнгийн албан татварын тухай" хуулиар иргэний амьдран суух зориулалттай орон сууцыг орон нутагт тоо харгалзахгүй, нийслэлд хоёроос илүүгүйг татвараас чөлөөлдөг ч гарааш, авто зогсоолын зориулалттай үл хөдлөх хөрөнгө энэ чөлөөлөлтөд хамрагддаггүй.

Татвар ногдуулах үнэлгээ нь 50 сая төгрөгөөр тогтоогдсон гараашид нэг хувийн татвар тооцоход жилд 500 мянган төгрөг төлнө. Өөрөөр хэлбэл, зөвхөн автомашинаа байрлуулах зориулалттай үл хөдлөх хөрөнгөндөө сар бүр дунджаар 41,667 төгрөгийн татвар төлж байгаа юм.

Өөрийн болон гэр бүлийн хэрэгцээнд ашигладаг нэг гарааш, авто зогсоолыг татвараас чөлөөлөх тухай нийтийн өргөдлийг Ерөнхий сайдын зөвлөх, хуульч, өмгөөлөгч О.Батхүү санаачилжээ. 2026 оны аравдугаар сарын 19-ны байдлаар уг саналд 47,551 хүн гарын үсэг зурсан байна.

Хэрэв ийм зохицуулалт батлагдвал хэрэгцээндээ ашигладаг нэг гарааш, авто зогсоолын татвараас чөлөөлөгдөх боломж бүрдэнэ. Харин олон гарааш эзэмшдэг, бусдад түрээслүүлж орлого олдог иргэдийн хувьд татварын зохицуулалт хэвээр үлдэх эсэх нь хуулийн төсөлд хэрхэн тусгахаас шалтгаална.