Гадаадын хөрөнгө оруулагчийн гомдлыг 30 хоногийн дотор шийдвэрлэнэ

Гадаадын хөрөнгө оруулалтыг татах, хамгаалах, дэмжих цогц үйл ажиллагааны төлөвлөгөөг Засгийн газрын өнөөдрийн хуралдаан хэлэлцэн баталсан байна.

Шадар сайд Т.Доржханд энэ талаар мэдээлэл өгч, 1990-2025 оны хооронд Монгол Улсад нийтдээ 52.3 тэрбум ам.долларын гадаадын хөрөнгө оруулалт хийгдсэнийг дурдлаа. Улсаар нь авч үзвэл 44.5 хувийг Нидерланд, 12.6 хувийг БНХАУ, 8.2 хувийг Сингапур эзэлж байна.

Салбарын хувьд уул уурхай 74.4 хувь, бөөний болон жижиглэн худалдаа 9.6 хувь, санхүү даатгалын үйл ажиллагаа 3.9 хувийг эзэлж байна. Гадаадын хөрөнгө оруулалтын 80 орчим хувийг уул уурхай татдаг тул хөрөнгө оруулалт төрөлжөөгүй байна гэсэн дүгнэлтэд хүрч, түүнийг хэрхэн төрөлжүүлэх талаар төлөвлөгөөгөө хэлэлцсэн гэж тэрбээр хэллээ.

Засгийн газар гадаадын хөрөнгө оруулалтыг таван чиглэлээр татах бодлого гаргасан:

• сэргээгдэх эрчим хүч,
• дата төв,
• нэмүү өртөг шингээх уул уурхайн салбар,
• хөдөө аж ахуй,
• аялал жуулчлал.

Өнгөрсөн хаврын УИХ-ын чуулганаар Эдийн засгийн эрх чөлөөний хуулийг батлахдаа Хөрөнгө оруулалтын хуулийг баталгаажуулсан бөгөөд уг хуулийн хүрээнд гадаадын болон дотоодын хөрөнгө оруулалтын үйл ажиллагааг идэвхжүүлж, урт хугацаанд үйл ажиллагаа явуулах боломжоор хангах юм.

Хөрөнгө оруулалт хийсэн тохиолдолд хөрөнгө оруулалт хамгаалагдаж, урт хугацаанд үр ашгаа аваад гарах боломж нөхцөлийг бий болгох агуулгаар хууль батлагдсан бөгөөд үүнийг ажил хэрэг болгох зорилгоор Худалдаа, хөрөнгө оруулалтын агентлаг үйл ажиллагаа явуулж байна. Тус агентлаг тогтолцоог бэхжүүлж, дотоодод хөрөнгө оруулсан гадаадын хөрөнгө оруулагчдыг хамгаалж, үйл ажиллагааг нь дэмжих байдлаар ажлаа уялдуулна.

Гадаадын хөрөнгө оруулагч Засгийн газартай холбоотой гомдол, санал үүсвэл Худалдаа, хөрөнгө оруулалтын агентлагт ирүүлээд 30 хоногийн дотор шийдвэрлэх чиглэлийг холбогдох яам, орон нутагт өгөх байдлаар зохицуулна. Олон гадаадын хөрөнгө оруулалтын асуудал хууль, шүүхийн шатанд очоод гацдаг тул тус агентлаг гомдлыг хүлээн авч, шүүхийн шатанд очихоос өмнө асуудлыг шийдэх чиглэлээр мэргэжлийн арга зүйн зөвлөмж өгнө.

Дээрх таван чиглэлээр хөрөнгө оруулалт хийсэн тохиолдолд гаалийн албан татвараас чөлөөлж, нэмэгдсэн өртгийн албан татварыг төсөл хэрэгжиж дууссаны дараагаас төлөх боломж олгоно. Томоохон хэмжээний аж үйлдвэрийн үйл ажиллагаа явуулсан тохиолдолд холбогдох хөнгөлөлтүүдэд хамрагдах боломжтой.

Түүнчлэн 100 тэрбум төгрөгөөс дээш хөрөнгө оруулалт Монгол Улсад хийсэн тохиолдолд 20 жилийн тогтворжуулалтын гэрчилгээ гаргаж өгнө. Ингэснээр томоохон хэмжээний хөрөнгө оруулагчид Засгийн газар солигдохоос үл хамааран татварын орчин тогтворжиж, үйл ажиллагаа явуулах боломж бүрдэх юм.