Гачуурт дахь 85 дугаар сургуулийн барилгыг 2027 онд шинэчилнэ

2026-2027 оны хичээлийн шинэ жил өнөөдөр орон даяар эхэлж, Улаанбаатар хотод 540 орчим мянган хүүхэд цэцэрлэг, сургуульд хамрагдаж байна. Энэ жил нийслэлд 12 сургууль, цэцэрлэг шинээр ашиглалтад орж, 940 хүүхэд цэцэрлэгт, 4100 сурагч шинэ сургуульдаа явж эхэлсэн байна.

Нийслэлийн Засаг дарга бөгөөд Улаанбаатар хотын Захирагч Б.Пүрэвдавга Гачуурт дахь нийслэлийн ерөнхий боловсролын 85 дугаар сургуулийн хичээлийн шинэ жилийн нээлтэд оролцож, “1962 онд байгуулсан Улаанбаатар хотын ууган сургуулиудын нэг НЕБ-ын 85 дугаар сургуулийнхандаа хичээлийн шинэ жилийн мэндийг хүргэе” гэж эхэлсэн үгэндээ 2017 онд ашиглалтын шаардлага хангахгүй гэж дүгнэгдсэн тус сургуулийн барилгыг 2027 оны зун шинэчилж өгнө гэдгийг мэдээлсэн.

Мөн тэрбээр “Сургууль хүртэлх зам” төслийн хүрээнд сургууль орчмын гарц, гэрэлтүүлэг, тэмдэг тэмдэглэгээ, хурд сааруулах байгууламжийг шинэчилж байгаа бол “Хүүхдийн ордон II”-ыг байгуулж буй талаар онцолсон.

Энэ хичээлийн жилд бага ангийн 188 мянган сурагчийг “Сүү” хөтөлбөрт хамруулж, долоо хоногт гурван удаа D аминдэмээр баяжуулсан сүүгээр үйлчилнэ. Цаашид хэрэгцээтэй байршлуудад 70 мянган суудалтай 84 шинэ сургууль барихаар төлөвлөсөн байна.

Нийслэлийн Засаг даргын орлогч Г.Жаргалсайхан “Гэртээ ойр сургууль” төслийг 21 байршилд хэрэгжүүлж, 8739 хүүхэд шинэ сургуульд суралцах нөхцөл бүрдэж буйг хэлсэн. Тэрбээр 85 дугаар сургууль нийслэлд байдаг 12 дотуур байртай сургуулийн нэг бөгөөд малчин өрхийн хүүхдүүд суралцдаг, Гачууртын Хуандайн ам, Шар хоолой зэрэг алслагдсан газраас хүүхдүүд 20 гаруй км замыг туулан хичээллэдэг онцлогийг дурдсан.