Г.Занданшатар С.Амарсайханд: Ярьсан бүх зүйлээ хууль дээр очиж баримтаар нотол

Хууль зүйн сайд асан С.Амарсайхан өчигдөр Ерөнхий сайд асан Г.Занданшатарыг алтны уурхайтай холбоотой хүнийг Экологийн цагдаагийн даргаар томилсон, "Вайнд майнд" ХХК-ийн 5 тэрбум төгрөгийн хээл хахуулийн асуудалд холбоотой гэх мэдэгдэл хийсэн. Үүний хариуд Г.Занданшатар өөрийн цахим хуудсаараа дамжуулан мэдэгдэл гаргаж, С.Амарсайханы ярьсан зүйлийг үгүйсгэжээ.

Г.Занданшатар мэдэгдэлдээ С.Амарсайханы тараасан мэдээллийг "ор үндэсгүй худал" гэж тодорхойлж, баримтаар няцаах гэсэн байна.

Гэтэл ар хударгаар “Айсан хүнд аргал хөдөлнө”, “Ичсэн хүн хүн ална” гэдэг шиг Хууль зүйн сайд С.Амарсайхан миний нэр төрд халдсан, ор үндэсгүй худал мэдээлэл олон нийтэд тараажээ.

Тэрээр нүүрсний болон боржин чулууны ордыг хувьдаа завшихыг санаархсан гэх мэдэгдлийг няцаахдаа, Ерөнхий сайд байхдаа 2026 оны хоёрдугаар сарын 6-ны өдөр Шүүхийн шийдвэр гүйцэтгэх байгууллагын удирдах ажилтны зөвлөгөөнд оролцож, Хөвсгөл аймгийн Бүрэнтогтох сум дахь Нүүрстэйн амны нүүрсний уурхай, Төв аймгийн Лүн сумын нутаг дахь Авдар уулын боржин чулуу боловсруулах улсын үйлдвэрийн үйл ажиллагааг сэргээх боломжийг судлах үүрэг өгснийг дурдсан. Энэ тухай Засгийн газрын албан ёсны цахим хуудсанд мэдээ нийтлэгдсэн гэж тэрээр мэдэгдэлдээ бичжээ.

Мөн С.Амарсайхан түүнийг Оюутболд гэх хүнийг Экологийн цагдаагийн газрын даргаар томилсон гэх мэдэгдлийг няцааж, өөрөө гуравдугаар сарын 27-нд Ерөнхий сайдын албан тушаалаас чөлөөлөгдсөн бол Оюутболд дөрөвдүгээр сарын 5-нд томилогдсоныг онцолсон.

Надад алт битгий хэл хайрга ч ухаж явсан түүх байхгүй.

Г.Занданшатар цааш нь Засгийн газар 2025 оны есдүгээр сарын 10-ны өдрийн хуралдаанаараа Цагдаагийн ерөнхий газрын Хар тамхитай тэмцэх газрыг бие даасан алба болгон өргөжүүлж, хар тамхитай дайн зарлах үүрэг өгсөн гэдгийг дурдаж, энэ тухай мэдээлэл Засгийн газрын цахим хуудсанд нийтлэгдсэнийг сануулсан.

Миний байр суурь: гэсэн хэсэгтээ тэрээр баялгийн мафитай тэмцэж ирснийхээ улмаас улс төрийн шахалттай тулгарч, албан тушаалаа өгсөн гэж мэдэгдсэн. Түүнчлэн хууль сахиулах байгууллагыг улс төрийн өрсөлдөөний хэрэгсэл болгох ёсгүй гэж үзэж байгаагаа илэрхийлсэн.

Би С.Амарсайханыг хотын дарга болох үеэс нь эхлэн дэмжиж, улмаар Ерөнхий сайдын хувиар Шадар сайдаар томилж байсан нь бодит үнэн.

С.Амарсайханыг танхимынхаа эсрэг байр суурь баримталж, Засгийн газрыг огцруулах гарын үсэг цуглуулж, санал өгсний дараа үүрэгт ажлаас чөлөөлснөө дурдаж, үүнд өс хонзон санаж худал мэдээлэл тарааж байгааг арга мухардсан хүний үйлдэл гэж үзэж байгаагаа илэрхийлсэн.

Г.Занданшатар мэдэгдлээ "Иргэн миний адил хуулийн өмнө тэгш байж, бүрэн эрхээсээ түдгэлзэн шалгуулахыг шаардаж байна" гэж мэдэгдлээ.

Харин өөрт тавигдсан асуултаас миний нэрээр бүү булт.

Тэрээр улс төрөөс холдож, өөрийн сонгосон замаар явж байгаа ч хулгай, худалтай эвлэрэхгүй гээд нүүрсчдийн бүлэглэлийн авлига, хулгайн сүлжээ, нам дамнасан хуйвалдаан, хүний эрхийг хөсөрдүүлдэг үйлдлийн эсрэг ард иргэдтэйгээ хамтран улс төрийн шинэчлэл хийх тэмцлийг эрчимжүүлэх болно гэж мэдэгдлээ.