Францын Ерөнхийлөгч Макрон Британид айлчлах үеэрээ 960 жилийн настай хатгамлыг үзэж сонирхов

Францын Ерөнхийлөгч Эммануэл Макрон болон тэргүүн хатагтай Брижит нар Их Британийн хаан III Чарльз, хатан хаан Камилла нарын хамт Лондон дахь Британийн музейд анх удаа олон нийтэд дэлгэгдэж буй эртний туүхэн дурсгалыг үзэж сонирхжээ.

Макрон хоёр өдрийн айлчлалаар Британид ирсэн бөгөөд энэ үеэр төрийн тэргүүнүүд хамтдаа музейд очсон байна.

Тэдний үзсэн дурсгал нь 11 дүгээр зуунд бүтээгдсэн, 70 метр урттай "Bayeux Tapestry" буюу Байёгийн хатгамал юм. Энэхүү хатгамал нь цайруулсан маалинган дэвсгэр дээр будсан ноосон утсаар урласан бөгөөд 1066 онд болсон Хастингсийн Тулааныг дүрсэлдэг.

Уг бүтээлийг өнгөрсөн долдугаар сард Францаас Британид зээлээр авчирч, 900 гаруй жилийн дараа анх удаа эх орондоо буцаж ирсэн гэдгээрээ онцлог юм. Энэ удаа төрийн тэргүүнүүдэд тусгайлан үзүүлсэн бөгөөд ирэх долоо хоногт нийтэд үзүүлж эхлэх аж.

Музейд болсон арга хэмжээний үеэр III Чарльз "Bayeux Tapestry нь манай улсын бүх хүмүүст танил, эдгээр арлуудын хувь заяаг бүрмөсөн өөрчилсөн түүхийг өгүүлдэг" гэж хэлсэн байна.

Хоёр улс уг бүтээлийг зээлэх асуудлыг олон жил хэлэлцсэний эцэст Францын Нормандиас Британид аюулгүй тээвэрлэжээ. Британийн музей уг хатгамлыг үзүүлэх тасалбараа энэ оны эхээр зарж эхэлсэн бөгөөд 24 цагийн дотор 2.4 сая фунт стерлингийн тасалбар борлуулж, түүхэн дээд амжилт тогтоосон юм.

Төрийн тэргүүнүүдийн үзвэрт саяхан ерөнхий сайдаар томилогдсон Энди Бернхэм гэргийн хамт оролцжээ.