Франц-Солонгос кино салбарт 500 сая еврогийн хамтарсан хөрөнгө оруулалт хийхээр болов

Өмнөд Солонгосын ерөнхийлөгч И Жэ Мён Францад айлчлах үеэрээ кино урлагийн салбарт хоёр улсын хамтарсан санаачилгад 500 сая еврогийн ($581 сая) хөрөнгө оруулалт хийхээ зарлажээ. Энэ тухай тэрээр Даваа гарагт Сэн-Поль-де-Вэнс хотод болсон Люмьерийн дээд хэмжээний уулзалтын үеэр мэдэгдсэн байна.

Хоёр улс ирэх жилээс эхлэн таван жилийн хугацаанд кино урлагийн салбарт тус бүр 500 сая евро зарцуулахаар болжээ. Энэхүү санаачилга нь хамтарсан төслүүдийг дэмжих, орон нутгийн контент бүтээгчдийг дэлхийн зах зээлд гаргахад туслах зорилготой гэдгийг И Жэ Мён тайлбарласан байна.

Киноны салбарт шинэ сорилт болж буй хүчин зүйлсэд цар тахлын дараах үзэгчдийн сонголтын өөрчлөлт, хиймэл оюун ухааны технологийн хэрэглээ зэргийг тэр дурдсан. “Хэрвээ бид цаг үеийн өөрчлөлтийг зөв авч үзэхгүй бол энэ нь мэдээж хямрал авчрах болно. Гэхдээ урьдчилан сэргийлж чадвал энэ нь тодорхой боломж олгоно” гэж И Жэ Мён хэлсэн байна.

Түүний Францын ерөнхийлөгч Эммануэл Макронтой хамтран даргалсан уг чуулганд дэлхийн 30 улсын кино, энтертайнмент салбарын төлөөлөгчид оролцжээ. Макрон “Өөрчлөлтийг хориглох нь бидний үүрэг биш, бид тэдгээрийг удирдан чиглүүлэх ёстой” гэж хэлсэн байна.

Чуулганаас батлагдсан “Люмьерийн Тунхаглал”-д талууд хөдөлгөөнт дүрсний салбарын өсөлтийг дэмжихэд хамтран ажиллахаа амлажээ.