Форт Хүүгийн халдлагын үйлдэгчийн цаазыг онлайнаар шууд дамжуулна

2009 онд Форт Хүүгийн цэргийн баазад 13 хүний амийг хөнөөж, 32 хүнийг шархдуулсан Нидал Малик Хасаныг буудан хороох шийдвэр хүчин төгөлдөр байгаа бөгөөд цаазын ажиллагааг арванхоёрдугаар сарын 3-ны Пүрэв гарагийн 13:00 цагт тус баазад явуулахаар товложээ.

Пентагоны тэргүүн Пит Хэгсэт цаазын ажиллагааг олон нийтэд нээлттэй зохион байгуулж, дүрсийг онлайн орчинд шууд дамжуулна гэдгийг өчигдөр хэвлэлд мэдээлсэн байна.

«Бид үүнийг хүмүүс үзэх боломжтой, олон нийтэд нээлттэй зохион байгуулах болно. Учир нь хүмүүс ийм төрлийн үйлдлийн үр дагавар ямар ноцтой байдгийг ойлгох хэрэгтэй» гэж Хэгсэт хэлсэн байна.

Хасан ямар нэг эцсийн хүсэлт гаргасан эсэхийг асуухад Хэгсэт «Надад энэ хамаагүй. Бид түүнийг арванхоёрдугаар сарын 3-ны өдөр харах болно» гэж хариулжээ. Шууд дамжуулалтын дэлгэрэнгүй мэдээллийг цаазын ажиллагаанаас өмнө нийтэд өгөх гэнэ.

АНУ дэлхийн хоёрдугаар дайнаас хойш цэргийн алба хаагчийг буудан хороох аргаар цаазлаагүйг Хэгсэт баталсан бөгөөд хамгийн сүүлд 1961 оны дөрөвдүгээр сарын 13-нд армийн байлдагч Жон Беннетийг дүүжилж байжээ.

Хасан нь армийн сэтгэл зүйчээр ажиллаж байсан хошууч цолтой асан бөгөөд 2009 онд гадаадад үүрэг гүйцэтгэх цэргүүд вакцинжуулалт, эрүүл мэндийн үзлэгт дугаарлан зогссон байранд галт зэвсэгтэй халдсан юм. Тэрээр «Аллах Акбар» хэмээн хашхираад лазерын тусгалтай буугаар гал нээж, хэдэн долоо хоногийн турш бэлдсэн нь сүүлд тодорхой болжээ. Бууныхаа сумыг маш хурдан сольж байсан нь халдлагыг зогсоох боломжгүй шахуу нөхцөл байдлыг үүсгэсэн талаар цэргүүд хожим дурссан байдаг.

Шүүх хурал дээр Хасан ах дүү муслимуудыг нь алахаар Афганистан явах гэж байсан цэргүүдийг зогсоохын тулд халдлага үйлдсэнээ хүлээж, өөрийгөө өмгөөлөх оролдлого гаргаагүй юм.

Ерөнхийлөгч Трамп өмнө нь Иранд олон нийтийн нүдэн дээр хүмүүсийг цаазаар авдаг арга барилыг шүүмжилж, Техраны дэглэмийн эсрэг тэмцсэн хүмүүсийг олны өмнө дүүжлэх гэж байгааг болиулах арга хэмжээ авч байгаа талаар мэдээлж байсан.