Flydubai-гийн нисгэгч ахмад руугаа сүхээр дайрсныг АНЭУ-ын прокурор тогтоов

Дубай хотоос Тель-Авив руу нисч байсан Flydubai компанийн онгоцонд 170 гаруй зорчигчтой байх үед хоёрдугаар нисгэгч хөлгийн ахмад руу дайрч, онгоцыг сүйрүүлэхээр оролдсон хэрэг гарчээ. Нислэгийн баг, зорчигчид хамтран уг халдлагыг зогсоосон байна.

Эхэндээ хоёрдугаар нисгэгч хутгаар зэвсэглэсэн гэж мэдээлж байсан бол Арабын Нэгдсэн Эмират Улсын прокурорууд Бямба гарагт түүнийг сүхээр зэвсэглэсэн байсныг тогтоожээ. Уг сүх нь нисгэгчдийн бүхээгт яаралтай үед ашиглах зориулалтаар хадгалагддаг байна.

Хөлгийн ахмад Смит Маччхар гэмтэл авч шалан дээр хэвтэж байхдаа эцсийн хүчээр бүхээгийн хаалгыг дотроос нь нээж чадсан бөгөөд ингэснээр нислэгийн багийн бусад гишүүд, зорчигчид бүхээгт нэвтэрч сүйрлээс сэргийлжээ. Халдлагын үеэр өндрөө огцом алдсан онгоцыг тэд хяналтад авч, Саудын Арабын нэг хотын нисэх буудалд аюулгүй газардуулсан байна.

Халдлага үйлдсэн хоёрдугаар нисгэгч нь Оман улсын иргэн гэдгийг Израилийн ерөнхий сайд Бенжамин Нетаньяху мэдээлжээ. Тэрбээр өмнө нь Oman Air компанид ажиллаж байхдаа исламын хэт үзэлтнүүдийн нөлөөнд автсан тул ажлаасаа халагдсан гэдгийг АНУ-ын хэвлэлүүд олж мэдээлсэн байна.

"Тэрбээр амиа хорлох сэдэл өвөрлөж байсан нь тодорхой байна. Онгоцыг унагахыг завдсан байх магадлал маш өндөр"

гэж Нетаньяху халдлага үйлдэгчийн талаар ярьсан байна.

Хэргийн нөхцөл байдал, сэдэл болон бусад сэжүүрийг илрүүлэх ажил үргэлжилж байгааг АНЭУ-ын ерөнхий прокурор Хамад Саиф аль Шамси хэлсэн байна.

Халдлагад өртсөн ахмад Маччхар Абу Даби хотын эмнэлэгт эмчлүүлж, биеийн байдал тогтворжиж байгааг АНЭУ дахь Энэтхэгийн элчин сайдын яам мэдээлжээ. Энэтхэг гаралтай ахмад олон хүний амийг аварсан баатар хэмээн өргөмжлөгдөж байна.

Нисгэгчдийн бүхээг дотор чимээ шуугиан гарч байгааг зорчигчдын нэг, Израилийн иргэн эмэгтэй Тали Манес анх мэдэж, онгоцон дотор түгшүүр зарлажээ. Түүний дараа түүний нөхөр Звика болон бусад гурван эрэгтэй зорчигч болох Янив Хаюн, Шота Мусаев, Асаф Ражуан нар ахмадын нээж өгсөн хаалгаар бүхээгт нэвтэрснийг Израилийн ерөнхийлөгч Исаак Херцог мэдээлсэн байна.

Хоёрдугаар нисгэгч онгоцыг ажиллагаагүй болгохын тулд удирдлагын хэрэгслүүдийг эвдэхийг оролдож байжээ. Бүхээгт нэвтэрсэн Хаюн халдлага үйлдэгчийн хоолойг боож, бусад зорчигчид түүнийг дарж тогтооход тусалсан байна.

Халдлага үйлдэгчийг бүхээгээс гаргасны дараа Хаюн болон ахмад нар онгоцны удирдлагыг авч, нислэгийн өндрийг тогтворжуулж чаджээ.

Лхагва гарагт CNN сувагт өгсөн ярилцлагадаа Израилийн ерөнхий сайд Нетаньяху хөлгийн ахмад, зорчигчид, нислэгийн багийн гишүүдийг "есдүгээр сарын 11-ний халдлага шиг үйл явдлаас сэргийлж чадсан" хэмээн магтсан юм.