Фил Жексонд зориулж хүрэл хөшөө босгохоо Лэйкерс зарлав

Хойд Америкийн Үндэсний Сагсан Бөмбөгийн Холбооны (NBA) “Лос Анжелес Лэйкерс” баг алдарт дасгалжуулагч Фил Жексонд зориулсан хүрэл хөшөө босгохоо мэдэгдлээ.

Майкл Жорданы эрин үед “Чикаго Буллз”-ийг дасгалжуулан лигийн аваргаар зургаан удаа, дараа нь “Лос Анжелес Лэйкерс”-т таван удаа түрүүлж, тоглогч байхдаа хоёр удаа аваргалж байсан Жексоны хөшөөний нээлтийг 2027 оны дөрөвдүгээр сарын 9-нд хийхээр төлөвлөсөн байна. Энэ сарын 17-нд 81 нас хүрэх тэрээр “Лэйкерс”-ийн хөшөө босгосон ес дэх хүн болох юм. Түүнээс өмнө Карим Абдул Жаббар, Коби Брайант, Мэйжик Жонсон, Шакил Онил, мөн тоглогч байгаад хожим удирдах алба хашсан Элжин Бэйлор, Пат Райли, Жэрри Уэйст, нэрт тайлбарлагч Чик Херн нарын хөшөөг босгожээ.

Коби Брайантын хоёр хөшөө ордны гадаа бий болсон бол гурав дахь хөшөөний товыг удахгүй зарлахаар төлөвлөж байгаа аж. Харин Пат Райлигийн хөшөөг өнгөрсөн хоёрдугаар сард байрлуулсан юм.

Фил Жексон “Лэйкерс”-ийг 1999-2011 онд 11 улирал дасгалжуулахдаа багийг нь бүх улиралд хасагдах шатанд өрсөлдүүлж байв. Түүний удирдлага дор баг нь долоон удаа шигшээд шалгарсан гэдэг.