Эстони: Украинд зориулсан байлдааны техникийн үйлдвэрт гал тавьсан хэргийг Оросын тусгай албад захиалсан

Наймдугаар сарын 15-ны шөнө Эстонийн нийслэл Таллинд байрлах, Украиныг цэргийн техникээр хангадаг «Milrem Robotics» компанийн ашигладаг барилгад гал гарсан бөгөөд үүнийг богино хугацаанд унтраасан байна. Мягмар гарагт Эстонийн эрх баригчид уг галыг Оросын аюулгүй байдлын албад захиалсан хорлон сүйтгэх ажиллагаа байсан гэж дүгнэснээ зарлалаа.

Гадаад хэргийн сайд Маргус Цахкна «ийм үйлдлийг бид огтхон ч хүлээн зөвшөөрөхгүй» гэж мэдэгдэж, Таллин дахь Оросын хэрэг эрхлэгчийг дуудан уулзахаар болсноо мэдэгджээ.

BNS агентлагийн мэдээлснээр наймдугаар сарын 17-нд хөрш Латви улсад хоёр латви иргэнийг сэжигтнээр саатуулж, маргааш нь гурав дахь сэжигтнийг баривчилсан байна. Сэжигтнүүдийг Латвийн эрх баригчид Эстонид шилжүүлэн өгчээ.

«Milrem» компани нь Украинд «THEMIS» загварын жолоочгүй газрын тээврийн хэрэгслийг нийлүүлдэг аж.

Эстонийн дотоодын аюулаас хамгаалах алба уг галдан шатаах халдлагыг «Оросын аюулгүй байдлын албад захиалсан, санаатай бөгөөд урьдчилан төлөвлөсөн үйлдэл байсан» гэж дүгнэсэн байна.

«Milrem-ийн эсрэг үйлдсэн халдлагын арга барил нь Оросын нэрийн өмнөөс Европт үйлдсэн бусад хорлон сүйтгэх ажиллагаануудтай ижил төстэй байсан» гэж тус албаны мэдэгдэлд онцлоод «энэхүү халдлагыг ОХУ-тай шууд холбоотой гэж үзэж байна» хэмээн нэмсэн байна.

Харин Кремлийн хэвлэлийн төлөөлөгч Дмитрий Песков «ийм мэдэгдэл нь үндэслэлгүй, бодлогогүй, бодит байдлыг огт тусгаагүй бөгөөд ямар ч нотлох баримт агуулаагүй» гэж мэдэгдсэн байна.

«Бид ийм мэдэгдлийг нухацтай хүлээж авах боломжгүй бөгөөд авах ч үгүй» гэж тэрээр хэлжээ.

Украиныг дэмжих явдлыг сулруулах, Европын улс орнуудын тогтвортой байдлыг алдагдуулах зорилготой хорлон сүйтгэх болон үймээн самуун дэгдээх ажиллагааг Москва явуулж байгааг Өрнөдийн албаныхан олон удаа буруутгаж ирсэн.

«Associated Press» агентлагийн тооцоолсноор 2022 оны хоёрдугаар сарын 24-нд Орос улс Украинд бүрэн хэмжээний түрэмгийлэл үйлдсэнээс хойш Европ даяар Оростой холбоотой хорлон сүйтгэх үйл ажиллагааны 200 орчим тохиолдол бүртгэгдсэн байна.

Эдгээрт агуулахуудыг галдан шатаах, дрон нисгэх, хилийн чанадад сөрөг хүчний хүмүүсийн амь насанд халдахыг оролдох, батлан хамгаалахын технологийг хулгайлах, Европын амин чухал дэд бүтцүүдэд кибер халдлага явуулах зэрэг багтжээ.

Хамгийн сүүлд наймдугаар сарын эхээр Лейпциг/Халле нисэх буудалд дроноор халдахыг завдсан хэрэгт Оросын аюулаас хамгаалах албадыг буруутгаж байгаагаа Германы эрх баригчид зарласан билээ.