Ерөнхийлөгч У.Хүрэлсүх НҮБ-ын 81 дүгээр чуулгын Ерөнхий санал шүүмжлэлд оролцоно

Монгол Улсын Ерөнхийлөгч У.Хүрэлсүх АНУ-ын Нью-Йорк хотноо зохион байгуулагдах НҮБ-ын Ерөнхий Ассамблейн 81 дүгээр чуулгын Ерөнхий санал шүүмжлэлд оролцох зорилгоор 2026 оны есдүгээр сарын 21-ний өдөр эх орноосоо мордлоо.

Энэ удаагийн чуулган болон Ерөнхий санал шүүмжлэлийг "Итгэлцлийг сэргээн тогтоож, шилжилтийг удирдан чиглүүлж, бүгдэд хүртээмжтэй Нэгдсэн Үндэстний Байгууллагыг цогцлоох нь" сэдвээр зохион байгуулах аж.

Ерөнхийлөгч уг чуулгын Ерөнхий санал шүүмжлэлд оролцож, олон улсын харилцааны тулгамдсан асуудлуудын талаар Монгол Улсын байр суурийг илэрхийлэн үг хэлэх юм.

Мөн тэрбээр НҮБ-ын Ерөнхий нарийн бичгийн дарга Антонио Гутерреш болон зарим улсын төрийн тэргүүнтэй уулзаж, харилцаа, хамтын ажиллагааны асуудлаар ярилцахаар төлөвлөсөн байна.

Түүнчлэн Ерөнхийлөгч 2026 оны есдүгээр сарын 24-ний өдөр Чикаго хотноо АНУ-ын төвийн бүсэд амьдарч буй монгол иргэдийн төлөөлөлтэй уулзах аж.

НҮБ-ын Ерөнхий Ассамблейн 81 дүгээр чуулгын Ерөнхий санал шүүмжлэлд 133 улсын төр, засгийн тэргүүн оролцохоо мэдэгдээд байна.

Монгол Улс 1961 онд НҮБ-ын бүрэн эрхт 101 дэх гишүүнээр элссэн бөгөөд өнгөрсөн хугацаанд НҮБ-тай бүс нутаг, олон улсын энх тайван, аюулгүй байдлыг хангах, далайд гарцгүй хөгжиж буй орнуудын эрх ашгийг хамгаалах, НҮБ-ын энхийг сахиулах ажиллагаанд оролцох зэрэг олон чиглэлээр идэвхтэй хамтран ажиллаж ирсэн.

НҮБ нь 1945 онд АНУ-ын Сан Франциско хотод 51 гишүүнтэй байгуулагдаж, өдгөө 193 орон гишүүнээр элсээд байна.

Өнгөрсөн жил НҮБ 80 жилийн ойгоо тохиолдуулан Ерөнхий Ассамблейн 80 дугаар чуулган, Ерөнхий санал шүүмжлэлийг "Хамтдаа хүчтэй 80 жил болон энх тайван, хөгжил, дэвшил, хүний эрхийн төлөөх илүү сайхан ирээдүй" сэдвээр зохион байгуулж байжээ.