Ерөнхийлөгч У.Хүрэлсүх ХБНГУ-д төрийн айлчлал хийнэ

ХБНГУ-ын Ерөнхийлөгч Франк-Вальтер Штайнмайэрийн урилгаар Монгол Улсын Ерөнхийлөгч Ухнаагийн Хүрэлсүх 2026 оны 10 дугаар сарын 19-22-ны өдрүүдэд тус улсад төрийн айлчлал хийхээр болсныг Ерөнхийлөгчийн Тамгын Газраас мэдээллээ.

Төрийн тэргүүний энэ айлчлал нь ХБНГУ-д 14 жилийн дараа хийгдэж буй төрийн айлчлал бөгөөд хоёр улсын боловсролын салбарын хамтын ажиллагааны 100 жилийн түүхт ойтой давхцаж байна.

Айлчлалын үеэр хоёр улсын Ерөнхийлөгч албан ёсны хэлэлцээ хийж, худалдаа, эдийн засаг, боловсрол, шинжлэх ухаан, соёлын салбарт харилцаа, хамтын ажиллагааг харилцан ашигтайгаар өргөжүүлэх талаар ярилцана.

Түүнчлэн "Монгол Улс, ХБНГУ хоорондын Хамтарсан тунхаглал" байгуулж, "Стратегийн түншлэл"-ийг өргөжүүлэн бэхжүүлэх хамтын ажиллагааны тэргүүлэх чиглэлийг тодорхойлох юм.

Хоёр улсын төрийн тэргүүн нар Берлин хотноо дэлгэгдэх "Чингис хаан ба Монголчуудын ертөнц" үзэсгэлэнгийн нээлтэд оролцоно.

Айлчлалын хүрээнд "Монгол-Германы бизнес форум", "Монгол-Германы шинжлэх ухааны өдөрлөг", "Монгол ба монголын дараах үеийн Евроази дахь соёлын солилцоо, байгаль орчин" олон улсын эрдэм шинжилгээний хурал, зохиолч Д.Нацагдоржийн мэндэлсний 120 жилийн ойд зориулсан эрдэм шинжилгээний олон улсын бага хурал зохион байгуулагдана.

ХБНГУ-ын Ерөнхийлөгч хоёр улс дипломат харилцаа тогтоосны 50 жилийн ойн хүрээнд 2024 онд манай улсад төрийн айлчлал хийж, нийтлэг үнэт зүйлд суурилсан харилцааг ахиулж, "Стратегийн түншлэл"-д хүргэсэн гэж Ерөнхийлөгчийн Тамгын Газраас мэдээллээ.